國泰工會永遠唔會夠

孫柏文- am730 (大明燈, M32, 22/11/2010 )

上個星期,國泰航空(293)宣布,於香港的1.3萬名員工,出年平均有得加人工,增幅介乎4%至到4.5%,做得好啲嘅員工更有得加一成;而且,所有員工都會有一個月年終獎金同3星期嘅額外花紅。

正常來講,加人工點都會開心,之但係,加人工消息出咗之後,國泰工會就循例走出嚟話唔開心,話要加夠一成先安樂,仲話可能會喺聖誕節罷工,擺千千萬萬個好辛苦儲到假去旅行嘅港人上台,大家分分鐘又要做人質。

有位朋友將呢單新聞擺咗上Facebook,我喺佢度留comment話,國泰員工有幾可會開心、有幾可會覺得夠,有破紀錄咁多個like。

另一班在特區內,冇乜幾可會覺得開心嘅,就係一班自稱80後嘅人,無論喺咩情況之下,佢哋都會「表示不滿」,最多人知道嘅,當然係佢哋成日喊話啲樓好貴,而佢哋嘅努力終於得到回報。

唔知財政司長曾俊華係咪見佢哋喊得咁辛苦,想俾佢哋拉吓Banner話「成功爭取」,滿足吓佢哋嘅弱小心靈,於上星期五再次出手打壓樓市,宣布2年內轉手嘅物業,要俾「額外印花稅」5%至15%。嗰日嘅后海灣地震,明顯唔夠今日啲地產股震得咁厲害。

雖然今次曾司長開口埋口炒家前炒家後,但係出招後死邊個先?係唔係真係炒家?傳媒追訪所謂炒家嘅市民,個個聽到新措施後,都泰然自若咁話:「最多唔賣轉租」。

反而,有位仁兄打上電台話,儲咗好多年首期,新措施推出前一日簽臨時買賣合約首次買樓,樓價280萬元,政府出招後,銀行將估價由260萬元,降到230萬元,仲要最多只可以上七成會,結果好可能要撻8萬元訂。

政府加印花稅呢招,只係得唔使搬屋嘅高官同有錢人先會諗到出來。如果你因工作需要而搬屋?too bad!失業要賣樓減債?too bad!屋企有事,例如屋企人病咗要籌醫藥費,急需賣樓套現?too bad!以上林林總總嘅人,都會成為咗輸家,侷住賤賣資產,甚至蝕讓。炒家見到政府造就機會俾佢哋,仲唔笑呵呵?

雖然今次政府放好多風俾傳媒,話措施訊息係唔想人喺呢個時候買樓,但係,特區政府求神拜佛,樓市千祈唔好大跌。

一旦花旗國突然提早加息,或者突然出現「黑天鵝」令經濟變差,失業上升,董建華年代嘅大量負資產情況重現,曾特首任期完成之前,可能要走出來講:「額外印花稅………已經唔存在喇………」

我哋當日將港元同美元掛鈎時,係將貨幣政策外判俾鐵腕般嘅Paul Volcker,今日已變成伯南克,無奈嘅感覺,失去嘅購買力,如何自保?

(作者為前石油業證券分析員,視股市為終身學習場所,不斷交學費。)

 

Facebook Comments

Leave a comment