教育唔怕商品化

孫柏文- am730 (大明燈, M40, 29/11/2010)

自從審計署出報告話,直資學校帳目混亂之後,直資學校日日都被人圍插。

喺孫柏文呢個財經口水佬眼中,直資學校的營運手法好似香港嘅非上市公司,盤數係亂,但顧客Buy,家長排隊都要送小朋友入直資學校。

每次講到學校有家長話要有權選學校,一啲教育界嘅既得利益者一定走出來話:「教育唔係商品,唔可以用市場方法去分配。」

 

有區議員同孫柏文講:「傳統學校嘅校長心態就像個公務員;直資就係教育entrepreneur(企業家),顧客永遠行先。雖然係咁,但呢啲直資中學收得政府錢,就應該做好啲」。

今次背後混帳得最嚴重嘅幾間直資中學,同供應商合約唔清唔楚,又捐獻又剩錢,話佢哋盤數一塌糊塗,應該冇人會反對,不過,就算以後10年,呢幾間學校盤數完全冇改善,家長都係照樣大排長龍,希望呢啲學校會收自己仔女。

孫柏文真係希望自稱民主派、但永遠匿喺功能組別嘅立法會議員張文光唔好再扮正義,抽直資學校水。學校盤數係點,並唔係家長考慮選校嘅條件;家長揀學校,係睇間學校嘅教學質素,直資學校盤數幾亂都好,只要教學素質有保證,家長就會揀。

當然,教育界既得利益者又會話:「教育唔係商品」,覺得家長有選擇權就係唔啱,所以應該教育大鑊飯,要攪珠隨機分配。

荒謬嘅係,教師分配職位,就係用市場方法,教師就好似一個又一個嘅「商品」,可以自由擇業,但學生揀學校就要中央分配,嚴重雙重標準。如果教育既得利益者咁鍾意話教育唔係市場、唔係商品,咁樣以後教師職位,就要好似學生分配學校攪珠咁,按教師住所地區來分配職位,貫徹「教育唔係商品」呢個理念!當然,涉及既得利益,張文光會第一個出來反對。

教育唔怕「商品化」,最怕教育冇能力「商品化」。當學校水皮到就算唔使錢都冇家長肯送仔女去讀,既得利益者再講咩「教育唔係商品」,都只係唔肯承認自己教得差嘅藉口!孫柏文希望間間學教都係直資,因為今日發現直資學校帳目完全混帳,竟然仲可以有家長大排長龍送仔女入去,教學自由度只要稍為放鬆少少,教學質素就可以高傳統中學幾班。

張文光話,直資學校帳目混亂,應該勇於認錯。直資學校帳目再差,家長都仲係願意花真金白銀,兼排長龍送小朋友去讀,反而當年張文光力主推動嘅「母語教學」,家長聞風色變,高官同埋唔少立法會議員紛紛將仔女送去國際學校或海外升學,就知個政策錯得幾離譜。

張文光叫人勇於認錯,可惜佢欠全港千千萬萬家長同學生嘅一句「對唔住」,到今日孫柏文仍然未聽到。

(作者為前石油業證券分析員,視股市為終身學習場所,不斷交學費。)

Facebook Comments

Leave a comment