做Intern識人

am730 (大明燈 M33, 2011.2.21)

兩日前,電話響起。朋友:「孫柏文!我上唔返車呀!」一聽,唔使問,我已經知道朋友講緊嘅係佢放咗手上嘅白銀。
佢話放嘅原因,係因為早前白銀由每安士30美元回落,我勸啲做孖展,即借好多錢買白銀嘅人,應選擇先行套利,所以聽我話賣白銀。

我作為白銀戰隊隊長,聽到就即刻問:「乜你做孖展買白銀咩?」佢話冇,咁就令我好嬲,因為佢聽啲唔聽啲。話到明係做孖展先好賣,佢冇做孖展都賣,即係唔信我喺差不多5年前,當時白銀賣緊10美元一安士時,叫大家「一注獨贏買白銀!」嘅建議,亦提供至2016年嘅有效時間內,會見120美元一安士嘅目標價。

不過原來,我呢位朋友係冇放晒手頭上啲白銀。佢賣咗嘅只係啲銀行存摺裡嘅紙上白銀,佢仲有唔少一嚿嚿嘅實貨未賣。

咁我都安慰啲,因為由5年前開始,我都不斷重複咁話,買白銀,一,一定要買實貨,因為要放時好煩,就會逼住自己唔放,所以可以由10蚊,揸到百二蚊。定力唔夠,就要諗計。

二,就係買白銀時,唔好借錢,同埋最好就係月供,一出糧就買。原因白銀好難捕捉應該幾時入,最好就係,耐唔耐定時入。

只希望大家要從朋友嘅痛苦中學習,聽白銀戰隊隊長嘅說話。我哋白銀戰隊同啲央行印鈔狂魔嘅仗,至今尚未打完。

上個禮拜,我講過嗰位攞綜援嘅中大碩士畢業生,嗰日我亦提過話,我畢業後嘅所有工作,一係由人哋介紹,一係有人要我啲技能,所以搵人來搵我。咁見網友對呢樣嘢有反應,話:「咁都講得出口、唔知醜!」

我只可反問:「你要型?定要工?」識多啲人,特別喺工作上,係有著數。

點都好,我認為其中一個識多啲人嘅方法,就係做intern(實習生)。除咗識公司啲員工,以及老闆外,仲要識埋其他intern。

例如,我哋個政策智庫組織「獅子山學會」,就有個internship計劃。不過唔知點解,每年收十個八個intern中,本地大學生只得一個或兩個,不過外地讀書嘅港人,同外國人就真係唔少。因為外地啲自由市場智庫,好鍾意我哋訓練手法,所以介紹唔少老外後生仔女過來。

今日要講呢樣嘢,係因為我哋舊年嘅其中一位外籍intern,啱啱被選為新一屆Oxford University Conservative Association嘅主席。做過呢個位嘅曾經有Edward Heath,同埋一位當年未嫁,仲係叫Margaret Roberts嘅女學生。他們來過我哋度做過intern,就係識呢啲朋友仔,唔知他朝會唔會有共青來我哋個會度做intern呢?

Facebook Comments

Leave a comment