爽報 (財經V28, 2012.2.15)

中銀門口，排隊人龍，用溢價去買銀紙。呢種瘋狂，其實一啲都唔陌生。08年奧運紀念鈔，一樣有成街人排隊。

我仲記得，當年有朋友做私人銀行，客戶以為佢地有內部認購；結果，我位朋友要出錢請人排通宵。

唔知道個班紀念幣炒家，今時今日有無得閒攞啲紀念鈔出來欣賞下呢？又或者，有無人會將紀念鈔大連張掛響屋企客廳呢？「過得幾十年就值錢架啦！」好多自稱收藏家，一定會話，啲嘢擺埋一邊，就會「升值」。

價格升，唔代表價值升。幾十年後，一板三十連張價格可能升10倍，不過，鈔票購買力就跌到得返十分之一。見到價格上升就以為賺左，學名叫做Money Illusion。

下個月讀書會，我揀左Charles Kindleberger嘅《Manias, Panics and Crushes》。裏頭有解釋到，泡沫到咗亢奮階段，就會炒到去古靈精怪嘅所謂資產。香港家陣呢個情況，直頭有少少鬱金香嘅味道。

 

「最好印到人人都可以抽到一手啦！」唔知道，有無政客走出來，要求公平對待所有炒家呢？「嘩，到時就真係群情洶湧啦！」孫柏文話。

我又諗，如果今次中銀大量發行，例如一百幾十億；又假設，真係同胞購買力真可以掃晒呢一批貨，結果又會點呢？

教科書話，當High Power Money，即係M0被抽離體系，應該引來物價收縮。

講開又講，當我正在寫呢一篇文嘅時候，已經從網上睇到話，好多人已經搵唔到人接貨。唉，呢個泡沫，由醞釀到爆破，只不過係幾十小時嘅事。

不過，如果反省一下，就會發現泡沫都有大同小異嘅特點：

一，明明係浪費時間，破壞生產力嘅行為，例如排隊，但係竟然有人有錢落袋；
二，群眾但求盡快套現，究竟炒買嘅嘢點解有價值，無人關心；
三，最終接貨個班人，就算過咗好耐，都會希望見家鄉。

利世民

專欄電郵：SharpHK.Simon＠gmail.com　
Facebook專頁：www.facebook.com/AppleSimon