爽報 (財經V34, 2012.2.17)

過去幾星期，我試過從泡沫，即係貨幣理論去睇：

一，男女關係：「巨額交配」（1月20日）
二，新發財文化：「有錢人學做有錢人」（2月7日）
三，紀念品炒賣：「炒供求？」（2月9日）、「鬱金香味紀念鈔」（2月15日）

 

今日，點都應該講下特首選舉啦！正所謂，政不離經嘛。

首先，近年全世界都有資金泛濫嘅現象，香港只不過係呢個泡沫當中，炒得最熱鬧嘅市場之一。其次，香港嘅特點，就係聯繫滙率。港紙跟隨美元疲弱，連續幾年累積咗一個規模甚為可觀嘅資產泡沫。

身在泡沫其中嘅人，好多都唔會察覺，原來問題出自貨幣政策。好多人都會將生活艱難，講成資本家剝削。另一方面，又有一班人，因為呢個泡沫得到一筆橫財。政治矛盾，就係源自呢兩類利益。雖然香港未有得普選特首，但係政治議題仍然離唔開呢個宏觀經濟大氣候。
豬營，代表嘅係泡沫之下嘅得益者。所以，豬營主張大量興建公屋，免得直接同私人市場競爭；與此同時，解決咗居住問題，自然可為樓市運轉炒賣呢個經濟模式減少政治壓力。

狼營，代表嘅就係泡沫之下，未能得益嘅一班人。狼營主張復建居屋，並非要解決住屋問題，而係要用居屋來進行泡沫下嘅財富再分配。所以，大家從支持狼營嘅人，就可以睇得出佢地對顛覆現有秩序嘅渴望同追求。

其實，從其他政策主張，都睇得出兩派參選人嘅信念。撐豬營嘅有銀行家，甚至金管局前總裁白頭任都幫到出聲。至於狼營，不但無乜金融界支持者，甚至連官僚都唔撐佢。何解？

政府最重要收入，乃係通脹之下嘅泡沫特別稅，例如土地收入、股票印花稅等。破壞呢個模式，等於要政府失去方便之財。一直以來，香港政府無論點大使，都有盈餘，硬係通縮個幾年，偏偏就有財赤。貨幣供應鬆緊同政府收入多少，相輔相成，就算香港無獨立貨幣政策，呢個經濟規律仍然成立。

好似老總沙膽虹話齋，對呢兩個參選人，我地應該兩不相幫。

我唔認為泡沫經濟係健康，亦都好驚人用政府權威去再分配財富。我淨係想香港政府畀條生路大家自己去行。阿彌陀佛。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon