爽報 (財經V30, 2012.2.2)

以前，蘋果有新搞作，全世界都屏息以待。不過，最近一次主打教育嘅公佈，好似除咗一班忠實擁躉，對一般公眾嚟講好似無乜迴響。唔通係無新機出，無得炒，大家都無興趣？

蘋果用iBooks打入教科書市場，有市場角度、有投資角度、有技術角度、更加有社會角度，絕對係上佳嘅通識課習作。

先講社會角度，有人話教科書太落後，終等到蘋果出手，去開呢座古老石山，好似當年蘋果用iTunes殺入音樂市場。不過教育同音樂始終唔同，前者，消費者自己揀歌；教科書，一旦教師揀咗書，幾十人甚至幾百人都用同一本書。市場結構明顯唔一樣。有人話呢個市場結構，對最終消費者非常唔公道，因為教師揀書嘅誘因，並唔一定同最終消費者一致。

亦有人認為，呢個正正係教科書市場吸引嘅地方，只要攻入呢個市場，令到教師及其他教育官僚慣用iBooks，甚至成為行業標準，對手要後來居上，就要花額外嘅資源。

蘋果賣內容固然賺錢，不過最賺錢始終係賣機，如果iBooks成為教科書主流，賣機收入不但和味，且每年都有新生入學，其市場定位有穩定、可預計嘅需求，市場策略絕對上算。

政策窒礙教育制度

順帶一提，蘋果為iBooks作者推出iBooks Author，作者可免費用嚟自助出版，不過使用細則寫明，iBooks Authors編成嘅電子書，要獨家放到iBookstore。有人推測iBooks一出，蘋果有大條道理將阿瑪遜Kindle踢出App Store。事實上，Kindle亦有推出租教科書服務。蘋果要趕絕阿瑪遜，動機非常明顯。

阿瑪遜亦唔會坐以待斃，舊年中阿瑪遜已推出Kindle in the Cloud，Safari都上到，唔使畀App Store綑綁，除非蘋果連HTML5都封殺啦。

不過，阿瑪遜同其他公司趨向HTML5又帶出另一問題：既然到網上平台，學習點解要用「書」呢？事實上，好多Homeschoolers，學習除被動地讀書吸引，更多人鍾意睇片同做實驗。其實教育問題，講到底唔只教科書無與時並進，整個教育制度都畀政策窒息，電子教科書又可以帶來幾多改變呢？

利世民

專欄電郵：SharpHK.Simon＠gmail.com　
Facebook專頁：www.facebook.com/AppleSimon