爽報 (財經V32, 2012.3.22)

前晚，伯南克去George Washington University講書。老實講，佢講書真係唔算悶，至少比我好少少。

「全世界都有中央銀行，分別只係在於組織方面。」一開始，伯南克擺明車馬，肯定中央銀行嘅存在。呢一招，香港好多官員都用。大眾，就係好容易畀呢一種偽邏輯蒙蔽。其實人家有乜政策係一回事，政策有冇效？有乜反效果？呢啲先至係重點。

「中央銀行有兩大功能：穩定宏觀經濟同埋財經市場。」哦，金融維穩。其實，用最簡單嘅方法去解釋，就係用調控短息，來影響消費、生產、就業同通脹。不過，最具爭議嘅題目，始終係當金融機構有事嘅時候，中央銀行扮演最後貸款人嘅角色。

先將伯南克嘅Propaganda擺埋一面。央行嘅金融維穩角色，究竟有幾成功，可以從歷史嘅客觀事實睇到。硬係要話中央銀行居功至偉嘅人，永遠都可以話：「如果無中央銀行，經濟會死得更難睇呀！」

歷史冇如果，所以講乜都得。伯南克眼中，十九世紀下半葉好恐怖，經常有金融危機，所以廿世紀出現聯儲局，乃係應運而生。

不過，如果睇實質經濟發展，十九世紀下半葉，正正係美國工業生產力大幅爆升嘅日子。最重要一點，就係當時美國經濟錄得持續廿幾年嘅通縮。當然，各種宏觀經濟因素之間嘅因果循環，再辯論一百幾十年都講唔完。

太平日子無人關心究竟中央銀行做乜。不過，就正如一切同政府有關嘅機構，每次有危機，呢啲對應政策嘅主觀存在價值即時顯現。

危機並唔單止係價錢下跌咁簡單。資產價格下跌，造成銀行資產負債表收縮，反轉頭令到信貸萎縮，如此循環令資產價格再下跌；去到臨界點，銀行同業唔信其他銀行有能力還債，存戶都唔信銀行。

如果政府唔介入，不信任會觸發擠提，銀行即刻收水，令好多無辜企業因為周轉不靈而倒閉。

19世紀有個經濟學人主筆Walter Bagehot提出，危機時，中央銀行有三件事要做：1，盡借；2，要求銀行用優良資產抵押；3，徵收懲罰性息率。前晚，伯南克都有講。可惜，無學生識得問佢：「點解?家的中央銀行唔跟呢個規矩？」聽晚，伯南克又會講書。雖然我唔認同佢嘅觀點，但係佢講書都幾好睇嘅。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon