爽報 (財經V53, 2012.4.12)

「點樣發達？」呢四個字，財經版讀者每日都會諗。「有錢咪發達囉！」好多憤世嫉俗嘅人咁講；我更肯定，抱有呢個想法嘅，好難發達。

「有錢都唔算發達？咁點先算發達？」真正嘅有錢人，絕對無一夜致富呢回事。「錯喇！睇吓搞Instagram班後生仔，一夜之間，畀facebook用十億收購，個個富過中六合彩！」

一夜之間？不如問吓自己，人地捱更抵夜做隻App嘅時候，你又做緊乜？成功之前，有好多汗水，但成功之後，都被人遺忘，膚淺嘅人，總以為成功係一夜之間嘅事。

Instagram由開始到被人買起，用咗一年半時間；一年半，話長唔長。今日見到十億呢個銀碼，自然覺得一年半係極速爆起。不過，假如無呢個結局，又會有幾多人關心呢間公司呢？

「手機最重要功能，除咗上網，就係影相，第三先至係講電話。成功將影相同上網分享搓埋一齊，抵佢發達啦！」事後孔明，永遠都係最易做。不過，一年半前隻好似Instagram嘅App，會有幾多人同你講：「乜facebook唔係有相簿功能咩？好多人都做咗影相App啦，你隻嘢有乜咁特別？」
當你同人講，成功，並唔一定要全球獨家，只要做得比人家好、更精細、更有信念，嗰班以為有錢就等於發達嘅人就話：「嘥氣啦！信念邊搵到錢㗎？實際啲好喎！」

實際啲？點解硬係有人會覺得，有信念就係等於唔實際呢？呢種態度，香港人特別嚴重。會唔會係大家從小都已被填鴨式教育洗腦，覺得乜嘢都有標準答案，人生目標，就係去估中個標準答案。獨立思考，反而會斷送前程？

返去最原本嘅問題：「點樣發達？」

可以做一件事，有人要，你自然會搵到條路，堅持落去，就有機會發達。係咪好簡單？。不過偏偏好多人，寧願信發達係一夜間嘅神話。對唔住，我忘記咗，機會永遠都只係留畀願意去爭取嘅人。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon