爽報 (財經V44, 2012.5.15)

噚日講賭，反應唔錯，今日繼續。有次孫柏文搞講座，唔知點解我搭嘴講句：「請大家記住，買股票，係投機，係賭股票，唔係投資！」孫柏文嘅讀者同我嘅讀者，明顯係兩批人，有個叔叔聽到呢句就問：「我做足功課，準備長揸，點解唔係投資？」

「估一個鐘頭後嘅事容易？定係估一年後嘅事易呢？時間越長，變數越多，點解風險反而低咗？你做功課，好。但你研究嘅資料，人人都可以得到，你又知股價未反映你研究嘅因素？點解隻股票要喺你研究後先開車？賭枱旁邊，個個賭仔都好畀心機記低每一局開乜，做足功課，唔通咁就唔係賭？」

連串問題，通常都令自以為好勤力嘅股民好不滿。「咁你即係話乜嘢都係隨機！咁做人乜都隨機，唔使努力、唔使用腦啦！咁唔好投資啦！唔係，用你嘅講法，唔好投機，唔好賭啦！」

變數大　須知風險

「非也，我只想大家知道，股票有一定隨機性，而且變數肯定比大家想像中大。所以賭股票要有風險意識，明白賭嘅心態：一，賭本必須係閒錢，輸晒都唔會影響生活；二，賭本輸晒就收手；三，輸贏逐鋪計，無翻本拉上補下呢回事；四，絕對唔可以借錢賭；五，時刻提醒自己，無人可以預知未來。」

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon