爽報 (財經V52, 2012.5.24)

星期一寫的士，估唔到有好多讀者畀意見。一位讀者提到，話傳聞香港可能引入到電能的士，令牌主諗可能會慳咗油錢，助營運，最終轉成加租理由，從而令牌價有上升空間。另一位讀者更加寫咗篇好精彩嘅分析文章，將香港的士業嘅情況同80年代美國航空業過度被監管擺埋一齊講。

我就認為，問題始終是的士牌數目被政府限死。的士牌主，就好似班未來社會棟樑口中嘅地霸。當然，結論就係司機被剝削，財主靠炒賣、不事生產就可以賺大錢。

供應受限　市場扭曲

無論的士牌抑或土地，供應限制，令到市場有好大扭曲。不過，牌主同地主，承受投機風險同成本，並唔係班未來社會棟樑講到咁易。真正問題，其實出在政府控制供應。發牌及開新地，如果以市場規律運作，一早就增加供應，同時又增加庫房收入。?家嘅問題，反而係政府唔跟市場，產生連串扭曲。

唔可以增加的士牌數目，係因為每發出一個新牌，現存嘅牌就會因此貶值。牌主有政治誘因反對。

不過，如果可以做到，每發出一個新牌，原有牌主都有得分，或者可以解決得到供應被政治限制，解決扭曲，增加庫房收入。究竟可以點做？明天續談。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon