給暑期工的建議

爽報 (財經V52, 2012.6.11)

 

暑假又就嚟開始,又係到咗零售同服務業嘅「混沌期」。

一大批後生仔「暫時」加入職場,代表住消費者除咗要振興經濟之外,更加要肩負起培養新一代嘅責任。

「唔該,頭先叫咗碟牛腸,成十幾分鐘都未到喎。」早兩日,我去咗一間連鎖粥麵店食晏,發現成間舖頭,一個大人都冇,剩得三個後生仔睇住個樓面,已
心知不妙,結果真係錯漏百出。

「廚房仲有好多嘢整喎。」其中一個後生樓面嘅答案,擺明趕客。

傳統服務業嘅智慧:當遇到客人投訴,「道歉」並唔係最重要,更加唔應該出言辯駁,而係真心去幫個客解決問題。

呢位後生樓面,肯定係培訓不足。為咗香港服務業嘅未來,結果我都召咗佢過來,教訓兩句。之後,後生樓面一聲不響,轉身就返去水吧旁邊遊魂。

外國企業,對培訓服務業員工,其手法的確更加高明。好似星巴克(Starbucks),更加係出晒名培訓後生仔有一手。我睇過唔少案例,講及星巴克點樣幫青年從工作中建立自信,其中一個秘密,就係令佢哋投入「咖啡師」嘅角色。

相對上,香港企業對年輕人嘅培訓,模式都係比較技工式。好似我去嗰間連鎖粥店,其實都已經算係好認真。不過,後生仔搵暑期工,我始終會建議佢哋去搵「外國牌子」。有心嘅話,佢哋真係會學到好多嘢。

利世民

專欄電郵:SharpHK.Simon@gmail.com
Facebook專頁:www.facebook.com/AppleSimon

Facebook Comments

Leave a comment