金手指 : 借爆Grant Loan抽iBond

蘋果日報 (財經要聞B09, 2012.8.23)

 

孫柏文呢幾日都聽到好多人講兩個原意係福利既議題。一就係政府為大學生提供既低息貸款,大學生攞來「非原意運用」。第二就係政府出既iBond(4214),因為派息同政府計既「政府統計處甲類物價指數」掛鈎,亦因該率跌到得1.6%。

咁我聽完兩個議題既詳情後,第一個反應就係:「借爆Grant Loan抽iBond!」不過今日講點解之前,我想同批准iBond既人講聲:「我都話咗啦,警告咗你又唔聽。」

 

iBond息睇甲類物價指數

我講過D乜?記得政府第一次搞iBond(4208)時,我叫所有想抽既人諗吓iBond既回報係建基喺乜上邊?如果答:「通脹囉。」咁就錯晒,因為係建基喺「政府統計處甲類物價指數」上。

有乜分別?前者係上億件貨品、服務交易或標價時,因貨幣供應太快,出現貨品普遍貴咗。後者可能係一個篤出來既數。我亦問,究竟知唔知係邊個計?不知名程度有如個D乜都唔畀你睇,連相都冇,不過又add你做朋友既facebook用戶。更重要係,邊個可以決定點計呢個指數?

當時,我已嚴重警告,推iBond之後,一個之前帶濃烈學術味道既官員,一個只作參考既數據,會搖身一變成為政治嘅血肉戰場。將會有各黨各派、「獨立人士」既抽水政客,「強烈要求」政府「正視」。原本計「政府統計處甲類物價指數」既個位官員,已面對好多以上講過既技術性問題,依家仲要淪為政場炮灰,大鑊。

 

買人心不成變計時炸彈

試問,未有iBond之前,如果政府話甲類物價指數升咗1.6%,大家首先唔會質疑計法,而政府就可開晒香檳話成功控制物價。依家?咪話「通脹未解決、計法有問題」囉。我想問政府,為一個原本係想收買人心,經濟上嘥社會資源,福利上補貼啲有幾十萬元既有錢人既政策,搞到好似計時炸彈咁,日後爆管治危機,值咩?Oh wait,前特首曾蔭權已走咗。

講番借爆Grant Loan抽iBond。我冇係香港讀大學,所以同個D成績唔好,一早出來做野既朋友一樣,只有交稅夾錢,冇份享用。睇噚日報道,最正一定係恒生管理學院商學院院長蘇偉文,佢話:「教育已經係對自己最好既投資,係咪真係要賺到盡,學生真係要諗吓。」以我推斷,正式回應就係咁講,不過蘇院長佢心裏諗:「你班靚仔靚妹,如果讀完恒商都唔識走去借盡呢筆平錢,真係唔去走去話係我哋嘅"alum"囉,啋!」因為如果利息一厘,用上市價計iBond最少都一厘,以特區政府信貸穩健程度,最多輸手續費。

仲有,如果甲類指數高,揸iBond就冇問題。不過如果係全球咁樣印鈔票嘅情況下,都出現通縮的話,等於有歐洲爆大鑊級數既金融危機發生,銀行信貸系統已心臟病發,完全停頓。咁就係iBond真正贏大錢嘅機會!點解?大家計來計去,都係政府派幾多息,忽略既係當全球銀行都冇人信時,資金就要搵避風塘,試問有乜疊水過我哋特區政府呀?到時,如無意外,係公開市場買iBond,唔好話一厘,我絕對相信用公開市場iBond成交價計,會係負利率,即係啲人用溢價搶iBond。

我地香港,由開埠已來,一路既核心business model,就係借人哋唔識用既錢,低價買野,做caretaker,之後沽畀D出高價既「有需要人士」。所以,如果今時今日D學生能讀書時已咁做,我就卒之放心,香港既DNA唔會係廢青當道既氣候下滅亡。

 

孫柏文

作者為獨立股評人

本欄逢周二、四刊出

Facebook Comments

Leave a comment