水浸眼眉點樣游上岸

爽報 (財經V34, 2012.9.19)

 

昨日講到,買金,就好似攬水泡,鈔票購買力被削弱,至少可以持盈保泰(用前輩曹仁超嘅講法)。不過,金,看從失去咗貨幣地位,唔可以用來做資本,創造更多價值。

人,要生存,一定要不斷創造價值。用昨日嘅比喻,創造價值,就係學識游水。大洪水來臨,攬水泡可以令你唔會被浸死,但係唔識游水上岸,最終你都會喺大海中心餓死。試諗吓,兵荒馬亂之際,你有一條金,但我識整麵包。最後,我可能會擁有條金條,而金肯定唔可以當麵包食。再者,整麵包嘅能力,無論點都唔可能俾人搶咗去。

識得點樣生產,當然係最有價值嘅技能。不過,搵食唔一定要識生產。只知道,邊度有人識生產乜嘢,代價係乜,就已經好足夠。從前嘅香港人,最叻就係做貿易。資訊發達,機會點都唔會比以前少,但係競爭一定更大。不過,市場上最終極嘅求生技能,係知道有乜嘢人,要乜嘢貨。無論資訊幾發達,都取代唔到呢種洞察市場嘅能力。除此之外,人永遠都有基本需要:人身安全、食、住,呢三樣無論經濟好壞都要存在。

上星期五,我上有線《開市埋位》同Jim少黃國禧、黃金戰士潘國光講開呢個題目,我就話:「只要相信人類文明會繼續,人就會有需求。」Jim少就話,佢寧願千金散盡;黃金戰士就覺得農地、軍需等,都有得諗。所以,就算毀滅式大洪水湧到埋身,只有肯動腦筋,一樣有計。

究竟揀乜嘢股呢?師傅教落,有壟斷地位、有定價能力、收入派息穩定嘅公司,係首選。靠資產泡沫推動增長,薄利多銷型,例如礦產,股價會大上大落,屬投機。最下算,係純粹為咗高少少回報買嘅垃圾債,因為,你永遠唔知,中央銀行人為壓低息率嘅干預行為幾時破功。

李兆富

Facebook Comments

Leave a comment