iPhone睇宏觀大勢

爽報 (財經V30, 2012.9.24)

 

蘋果同iPhone 5,可能有人覺得講到爛。不過,呢間世界上市值最高,持有最多流動資產嘅公司,永遠都有故事值得發掘。

上星期五,有線「Money Cafe」入面,Chris Lau問我一句:「世界上,有冇產品可以好似iPhone咁樣,做到可以有近乎藝術品咁嘅層次。」汽車!世界上有樣產品,可以令人朝思暮想,當藝術品去欣賞,就一定係汽車。不過,汽車工業,用咗接近一個世紀去完成嘅演變,蘋果用十年,就係由Steve Jobs返蘋果到iPhone出世。廿世紀美國嘅工業代言人,係Ford,廿一世紀,就係Jobs。

當年Ford嘅Model T,一架車,一隻色,要人人做車主。Jobs就係一部機,一個款。美式企業嘅霸氣,時至今日,仍然未有其他國家嘅人做得到。

有人唔鍾意呢種霸道,我明。但平心而論,iPhone,除咗霸氣,細緻之處先至係賣點,識欣賞嘅人,就明白;唔識嘅,都至少會知道,只有iPhone先有人通宵排隊去買。

美國大晒?唔係。美國企業,久不久就會衰落。當年汽車工業,就曾經一度俾人後來居上,前後亦不過廿年光景。日本汽車工業可以一度領先,最主要原因,係日本人做事,比美國企業更有規有矩,亦更加細緻。可惜,連串公共政策錯誤,加上封閉嘅思維,日本經濟到八十年代,失去以前嘅創新能力。結果,鄰近嘅小龍經濟,尤其是南韓搶過頭。如是者,日本工業就淪落到一班尾。

最有能力挑戰美國嘅地方,會係邊個?中國?對唔住,大國堀起嘅霸氣屬於粗魯而小家,而未有個種「細緻」。韓國?韓國係有競爭力,亦有非常之強嘅求生意志。買當頭起,我寧願睇韓國。不過,大家要知道,下個技術突破,可能同電子無關。三星老闆李健熙,早幾年已經開始投資生物科技同納米技術(唔係呃神騙鬼嘅脂肪幹細胞或者納米水)。呢種遠見,值得一讚。

不過,三星嘅研究基地,遍佈世界各地,而且美國為主打。三星嘅出路,會好似Sony同Toyota,變成一間美式嘅跨國企業。講到尾,美式霸氣,先係王道。

 

李兆富

Facebook Comments

Leave a comment