就業差? 有QE?

爽報 (財經V37, 2012.9.10)

 

上星期五,美國公佈8月就業數據,主流媒體話疲弱,原因差過預期。事實呢?今年8月新增非農業職位96000個,對比上年同期85000個,你話差,我都無話可說。其實,平均每周工時對比舊年亦增微升0.2%。將就業人數乘以工時,過去半年美國勞工市場增長,仍然徘徊於過去近幾年來嘅平均區間。不過,2012年上半年,職位增加得更快,以致各大行策略師上調預測。

策略師預測錯誤,同經濟增長唔理想,係兩回事。不過,去到呢個地步,個個都淨係睇有冇QE。單憑呢點,就足以令我覺得,投機市場好唔健康。

大行策略師從來未試過咁關心就業。可惜,入金融機構做策略師嘅經濟學學生,通常背景都唔會畀心機研究微觀經濟學。失業,佢哋只會理解成需求不足;需求不足,只要刺激經濟;刺激經濟,一係政府增加開支,一係就央行放鬆銀根。以上嘅宏觀調控方程式,行咗幾年,成效係點,大家有眼睇。填鴨式教育,度度都有,唔係香港特產。常識話畀我哋知,影響就業有好多原因,其中之一,係人口流動性。年初,美國樓市有起色,有人鬆綁,搬屋搵新工。年中,好多地區住宅盤源又減少,加上各大市區租金上升,對流動性點都有影響。總之,點都唔係淨睇整體需求咁簡單。

 

李兆富

Facebook Comments

Leave a comment