爽報 (財經V39, 2012.9.21)

每朝早起身，都見到我老竇睇電視嘅財經節目。多數時候，都係佢有佢發表偉論，我有我嘆咖啡。兩個人睇法南轅北轍，免得過，我都係唔出聲，費事搵嚟拗。不過，昨日佢問咗一個簡單得來又幾深嘅問題，都值得講吓。

「點解啲央行唔直接印銀紙？政府每個人派錢，對刺激經濟仲有效啦！用美國做例子，頭兩輪QE，加埋聯儲局買資產，兩萬億元有多。如果變成派錢，即係每個美國人有6666美元。先唔講對經濟有冇幫助，窮人一定開心啦！」

冇錯，如果有任何政策，社會上有一部份人先開心起來，好大機會，呢個政策有蠱惑。

「咁你又知唔知究竟QE點運作？」我唔敢話我老竇一定唔知，不過，問吓佢，至少可以睇吓，平日我做節目佢有冇留意內容。

「政府發債，央行買。央行揸債券。錢就……係喎！錢去咗邊度呢？」冇錯。有人話，QE唔係印銀紙。哦，敢問一聲，央行嘅公開市場運作，透過御用莊家，即係Primary Dealers，二級市場買入國債同MBS，用乜嘢買呢？唔通用黃金買？班人口口聲聲話QE唔係印銀紙，唔通印廁紙呀？

連我老竇都知，央行QE，二級市場買入國債同MBS，就等於畀銀行有一次賺錢機會。乜嘢叫好過印銀紙？當然係知道每日朝早，會有人同你不問價咁攞貨啦。兩次QE，啲錢一部份畀銀行賺，另一部份，就係發債嘅政府庫房。政府嘅錢，唔係福利。對於負債纍纍嘅國家，呢筆錢，就用咗去還債息。乜嘢人揸住呢啲債呢？基金、有錢人……

QE濟富，通脹令到冇資產嘅窮人更窮。劫貧濟富，就係咁解。不過，好似我老竇咁諗，直接派錢又通唔通呢？人人多咗銀紙，即時通脹出現。有資產嘅人，仍然冇有怕。窮人又增加購買力，開心一陣，好快又嘈唔夠錢使。歷史教訓，政府直接印，死路一條。不過，E家距離呢一步，都唔係太遠。

李兆富