爽報 (財經V37, 2012.10.12)

 

早兩日，港大民意研究計劃，聯同一間放數公司，噢，應該話私人貸款公司，公佈個「調查」。結果係，有部份80後，欠卡數，但係無意欲找清條數，利叠利之下，最終有人要卡冚卡。嘩，大新聞喎！

信用卡，利息高，因為無抵押借貸風險高。放數公司，資金成本高過發卡銀行，利息收得更平，一來因為要競爭，二來因為放數公司收數手法比銀行更「直接」。再者，所謂更低息，其實當中有唔少行政費，計埋條數，真正可以慳到幾多呢？

 

借錢去賭唔抵可憐

坦白講，市場競爭之下，好難搵到大大隻蛤蚧周街跳。肯去花時間了解發掘，話唔定可以慳到少少。話說回頭，如果肯去了解研究，又點會因為消費而落得長期負債嘅下場？

當然，未必個個都因為購物而負債。我聽過嘅理由，有進修瘦身美容投資（或投機）。進修？有學習心，可以事事都上維基百科查吓、買書。

學習，要嘅係心機同思考，唔係錢。至於買沙紙去證明自己，行為本身反映冇了解行情。千祈唔好同我講話顧主淨係睇沙紙，呢啲只係一廂情願同辯駁。

瘦身美容？請問落街跑步，買一對跑鞋，究竟要幾多錢？食得健康，要嘅係紀律。健康同美態，多多錢都買唔到。

碌卡，或者借私人貸款去投機，最蠢。

超低回報嘅世界，要賺埋銀行同放數公司嗰份利潤，然後先至計值博率，恐怕畢菲特都搞唔掂。世界上，最唔抵可憐，就係借錢去賭。碌卡或者借私人貸款供基金，係蠢中之蠢。ETF咁平，又唔見你去買？

 

寧求親友借錢應急

真係一時三刻遭遇不幸，要錢應急點算呢？傳統智慧教我哋，最好問親朋戚友。開口問人借錢確係難，但係，有借有還，先至係上等人嘅表現。

再者，畀足利息，當畀個機會自己人賺些少，何樂而不為？老一輩嘅思想，有一定嘅道理。唔知港大民意研究計劃，肯唔肯為學術貢獻，做番個傳統理財價值觀調查呢？

 

李兆富