爽報 (財經V27, 2012.10.22)

迫金局主席胡紅玉話：「唔排除政府做強積金公共信託人嘅可能性。」

話說，有政治演員提出，既然私人搞嘅強迫金，管理費咁高，不如政府搞，收平啲。積金局聽到呢啲九流屎橋，反應竟然係，唔排除呢個可能性。計我話，玉姐其實不知幾高興。眾所周知，玉姐不嬲都最想搞「傳聞大鑊飯」，即係好似歐美國家破晒產嗰種。如果真係有個政府公共信託，再行多幾步，咪可以理想實現囉。

好學唔學，明知會搞到好似希臘咁破產，政治演員死都要搞「傳聞大鑊飯」。私人迫金公司搞到打工仔焗住蝕，政府搞，唔通就可以跑贏大市？想必賺？除非公帑補貼啦。政治演員啲九流屎橋，真係毒。「我哋計過數，一定係可持續！」政治演員話佢哋計過度過，「傳聞大鑊飯」一定可以撐落去。不過當年歐美國家，何嘗唔係好多精算師計過數？人哋今日點解破產？

遲早乜都靠政府

「傳聞大鑊飯」一定破產，係常識。如果一個人，要靠自己嘅積蓄，由65歲養到自己80歲，即係要儲15年使用。假設呢個人，25歲之前，所有供書教學，衣食住行，都由父母照住。25歲之後，又唔使照顧其他人，自己搵、自己使，咁都只係有40年賺錢。用40年收入，養自己55年，你話有幾艱難？政治演員仲要有返工嘅人，養埋冇返工冇收入嘅人，唔使精算師去計，都知道有幾大鑊。

有次，偉大工人領袖李卓人，上電台被人質問，呢種希臘模式嘅「傳聞大鑊飯」唔可能持久，偉大工人領袖李卓人話：「至少我哋都享受過幾十年吖？」你就享受幾十年，香港就折墮一世？今時今日嘅後生仔，已唔係好儲到錢，仲要俾人分晒所有收入，我肯定到時香港一定會出生率又再下降，加劇人口老化。正如之前講，咁搞落去，唯一出路，全民唔止退休，而係乜都要靠政府。

香港一旦財政破產，我哋就要死死哋氣，向北京求救。到時，大家都唔使講乜嘢港人治港，一國兩制。唔信？試吓問希臘人，佢哋國家係邊個話事，睇吓幾多人會話：「歐盟同德國」。

天佑香港。

李兆富