踢爆迫金局利益集團

爽報 (財經V33, 2012.11.28)

 

「外面班人好嘈呀!諗辦法搞搞佢啦!」迫金局掛名主席玉姐,雖然坐冷氣房,不過都感覺到廚房嘅熱力。

「搵間顧問公司,寫份冇人睇嘅報告,然後咪同班大聲公講,係班基金佬貪咋。」迫金局話事人德霖夫人深明政府之道,在於卸責。

冇競爭而自肥

結果,迫金局搵咗間顧問公司。當然,做顧問公司,第一件事,就係摸中金主心意。金主想卸鑊,顧問公司冇理由去踢爆,其實香港迫金業缺乏競爭,最大問題在於迫金信託人嘅監管,多又繁,更無謂

顧問公司:「管理費可以減。」大石同死蟹之間,係唔容許有道理。

最奧妙係班迫金信託人,一個二個同活死人嘅口脗,叫香港人唔好淨係睇管理費,要睇埋回報喎。

吓?睇回報?好肉酸喎條數!淨係同盈富基金(2800)相比,迫金都輸十九幾條街。迫金信託人,真係當香港人係傻㗎!

總之,迫金局就話:「我都唔想㗎!咁啦,如果唔減管理費,就立法監管。」

大家估吓,邊個第一個拍爛手掌?

梗係已經壟斷市場嘅迫金信託人啦!本來已經缺乏競爭,再加多個「金剛箍」,以後都唔使旨意有外來者有興趣加入競爭。最好,當然係做低一兩間迫金信託人,剩低嘅,就可以繼續分呢個不斷自動膨脹嘅餅,真係肥到底褲都冇size啦!

迫金局同迫金信託人,係同一個利益集團,大家唔好咁天真同咁傻。

 

硬規管成本高

又有政治演員話,不如將筆錢交畀金管局去炒。又係傻嘅,先唔講點解全香港人要將財富交畀德霖先生夫人打骰,金管局其實都有請投資銀行做顧問。點解大家又唔問吓,點解世界各地有咁多退休金管理公司,硬係一班土炮可以喺香港搵食?梗係啦,迫金局嘅無謂規管,基本上只會令到回報低、成本高,係班出唔到汲水門嘅土炮迫金信託人,先至可以喺呢個環境搵到食。

當然,呢啲嘢,顧問公司一隻字都唔會提啦。

 

李兆富

Facebook Comments

Leave a comment