四十歲退休

爽報 (財經V38, 2012.11.29)

 

噚晚,喺街上見到一間基金公司嘅巴士廣告,大大隻字賣:「想40歲退休。」獅子錢莊嘅廣告,又賣「全民快樂退休」。

退休,係個人選擇,甚至係一種奢侈,之前我都有寫過,更加俾人鬧到狗血淋頭。

我個人唔反對退休,但係唔會諗幾時退休。大吉利是講句,如果有朝一日我冇能力工作,我覺得自己都時日無多。40歲退休,對我嚟講,係詛咒。

「唔係個個人都鍾意自己嘅工作,退休係一種解脫」。哦?或者呢個先至係問題。

工作嘅意義係乜嘢呢?「搵錢囉!工作唔係為咗攞錢,為乜嘢呀?」當然,如果唔鍾意份工,梗係為咗錢。不過,大家都應該知道,如果對份工冇興趣冇熱誠,升職上位發圍,應該都冇你份。

更加諷刺係,好多人,其實都冇諗過,退休之後做乜。「旅行啦,做吓義工啦,好多返工做唔到嘅嘢,退休咪可以做囉。」

我都明白,好多事情,都要趁後生做。去行絲綢之路、去馬爾代夫浮潛、去沙漠跑馬拉松,年紀大,冇錢,都好難完成。要靠呢啲搵食,亦唔係人人可以做得到。不過,要經歷呢啲嘢,又使唔使40歲退休呢?

有一種人,好少會將退休呢兩個字掛喺口邊。創業家,無論以前有幾成功,抑或幾失敗,都會有新搞作,甚至乎一把年紀,都會再創業。

開口埋口都講退休,只係反映一個人冇目標。工作當然係有收入,不過人家買嘅,係你嘅付出。如果連自己所付出嘅價值係乜嘢都唔知,當然好難睇到箇中意義。

我哋呢代人,閒閒哋可以活到80歲。與其諗退休,我覺得更加積極嘅心態,諗吓自己點樣建立第二事業(second
career)。人生頭25年,渾渾噩噩,未必搵到自己想做嘅事。之後嘅25年,雖然生活逼人,但係要搵興趣出路,點都會有辦法。

大學畢業之後,用15年時間,畀自己學一樣真正有興趣嘅事,再用10年去建立第二事業,如果有80歲命,第二事業至少可以養自己30幾年。點都好過後生流流諗退休。

 

李兆富

Facebook Comments

Leave a comment