點解會貧窮

爽報 (財經V27, 2012.12.03)

 

香港電台,真係最關心貧窮。話說,繼之前嘅《窮富翁大作戰》,又播一套叫做《點解會貧窮》。

「有窮人,因為呢個世界啲錢,俾少數人賺晒囉!」係囉,如果呢個世界冇晒有錢人,又點會有窮人?

香港真係變到面目全非。唔單係港台,整個香港,越來越少人諗吓,點解有人會發達,有人會窮。

成日都淨係識得講窮人有幾慘,好似嗰套《窮富翁大作戰》,搵班二世祖去瞓籠屋掃街,潛台詞就係:有錢同窮,係條命生成。你老竇大把,你就有錢;你老竇冇用,你就住劏房洗廁所。窮富翁最好拍續集,二世祖就將盤生意,隨便交畀一個社運青年打骰。一年之後,睇吓結果會點。

二十幾年前,香港嘅價值觀,係老竇窮唔緊要,最緊要下一代出人頭地。

「獅子山下精神,聽落好似粗口」。有個未來社會棟樑,社運精英,曾經寫過呢句話,更加得到唔少後生認同。嗰一刻,我已經覺得,呢個香港真係病入膏肓。當然,我唔會一竹篙打一船人,後生當中,總有人知道,財富並唔係天跌落嚟,更加唔係靠壓搾返嚟。

 

遭遇不幸 毋須氣餒

老套都要講,如果你想下一代好,請記住以下幾點:

一,小朋友成長過程,就係學習成年人世界規則嘅過程。當小朋友對人嘅世界開始發生興趣,就應該畀小朋友多啲同成年人社交。舊時代嘅大戶人家,對小朋友嘅教養,最重要嘅一點,就係畀佢哋多啲接觸世叔伯等長輩,從旁觀察學習成年人嘅社交關係。學校嘅環境,由小朋友帶大其他小朋友,太過依賴學校,只會令社會充斥大量「長不大的港孩」。

二,錢只係交易工具,並非天跌落嚟。要佢哋觀察人家有乜嘢問題需要解決,點樣幫其他人解決問題賺錢。幾乎所有有錢人,無論老竇幾窮,細個嘅時候,都有思考過呢啲問題。

三,幸福既非必然,但遭遇不幸亦毋須氣餒。可以絕地翻身,比起平步青雲,更值得驕傲。乜嘢都係假,最緊要係有賭未為輸。玩遊戲、運動比賽,比讀書更加可以訓練呢種心理質素。

 

李兆富

Facebook Comments

Leave a comment