冇息派又被罷工的國泰

爽報 (財經V35, 2012.12.11)

 

噚日,獅子山學會話事人王弼,好興奮咁同我:「你睇吓,國泰(293)除08、09年,停過一次中期業績,一次末期息,過去十幾年,就算沙士,都仲有得派息。」

我:「睇唔出你呢類保守派,竟然對周期敏感股份都有興趣喎!」

王弼:「唔係呀!今日我見到國泰工會用好多錢登跨版廣告,抗議公司『壓抑性加薪』,又將職位外流,同埋漠視工會地位。國泰工會仲話:『撐自己.撐國泰工會』呀!咁我咪研究吓,國泰管理層對小股東又點呢?」我:「有穩定派息,算係咁啦。」

王弼:「又唔係喎!國泰今次業績就冇派息啦!不過,公司冇派息,工人都總算有人工加,算係咁啦。不過,工會話2%唔夠,最少5%。」

國泰工會發言人曾國豐,同我都叫有數面之緣。之前曾生做過香港一個藍血政黨嘅黨工,據藍血黨入面比較「冇咁左」嘅朋友講,曾生都算係藍血左翼嘅推手;轉行加入富貴工會,都算係切合曾生嘅人物設計。

好似呢次,明明係工會同國泰討價還價,聲明就事先張揚將件事提升到全香港人嘅層面,係普羅大眾對抗大財團。國泰工會仲串連咗泛民好多藍血左翼。學嘢喇,呢啲,就叫政治。

講到尾,國泰工會都係想講:「如果要罷工,或者任何工業行動,都係被迫。各位假期諗住去旅行嘅香港人,對唔住,希望大家都為打倒資本家出一分力。」不過,歐陸左翼呢一套嘛,我就好懷疑香港有冇市場。

再講,國泰家陣逢星期二都有減價票,不過,上星期四我去睇,仲有好多賣剩囉。罷工?梗係博人鬧,最多一拍兩散。冇人鬧仲得人驚,一係,根本冇人幫襯;例如亞視員工如果罷工令電視節目停播,我諗最慘淡嘅結局,係大部份香港人,要第二日睇報紙先知發生乜事。

我明白打工仔點諗;加人工,改善工作環境,邊個唔想?但係,如果個工會負責人淨係想用呢個機會,打倒、鬥臭資本家,恐怕香港呢個氣氛未成熟。唔好當今日香港係七十年代歐美啦!善意提醒,不喜勿聽。

 

李兆富

Facebook Comments

Leave a comment