金手指:沽Yen起碼沽三年

蘋果日報 (財經要聞B09, 2013.01.15)

 

上個禮拜二,孫柏文叫大家一注獨贏沽日圓,仲話因之前嗰日,日圓回升彈一彈到87日圓兌1美元,所以要即刻借Yen來沽。

事隔一個禮拜,已經要89日圓兌1美元,咁就200點子,咁快就可以認屎認屁,呵呵。當然,作為fan屎嘅你可能會問,點解今次沽日圓雖有目標價,不過冇有效期?咁我就會話,橫掂我嗰個有十年有效期嘅一注獨贏買白銀建議,喺差不多七年前嘅2006年3月6日畀大家。咁到時,喺2016年3月6日,日圓都會勁弱,弱到148日圓兌1美元,嗰個就係有效期。

 

日本政府難減開支

上周話過今次沽Yen,係因為日本政府已經冇得借錢。日本總體喺呢幾年,人口老化到返工嘅人儲嘅錢少過退休人士使嘅儲蓄,所以淨沽國債。

咁你話ponzi scheme只要入嘅錢多過出嘅錢咪得囉?即日政府減開支就冇事。大家記得,日本政府係老人家選出來,對老人家,有兩個政策非常好。

一、通縮,因為儲蓄同定額退休金唔使做都升值。第二、就係政府不斷加大開支。大家應該留意到,老人家係唔care是否振興經濟。

咁點解成日話振興經濟?因為一講,政府又有藉口增加開支向支持者派錢。所以支出冇得減,又解釋點解日圓呢廿年不斷通縮升值。

咁冇得減開支,國債又冇買家,國債債息惟有上升以吸引買家。

不過,現實係零息世界,佢還國債嘅利息開支都達稅收嘅四成,當你嘅國債係GDP嘅兩倍半就係咁。利息升,仲唔死?所以日央行將會話為「振興經濟」,進行量化寬鬆,印鈔買國債,去㩒低長息。通縮到時真係唔存在囉,到時Yen仲唔跌?

我噚晚已經喺facebook成立「神風沽Yen隊」,大家喺嗰度見。奸爸爹!

 

孫柏文

獨立股評人

本欄逢周二刊出

http://facebook.com/shuen