佔領西環啦,唔該!

爽報 (港聞V04, 2013.03.11)

 

之前,有班未來社會棟樑,駐紮滙豐總行地下公共空間,是為佔領中環。其時,有西裝友和知識份子等,熱血沸騰,又話支持又話感動;事過境遷,未來社會棟樑繼續風花雪月,妄想如何結束資本主義,西裝友和知識份子等,就繼續苦埋口面做高級中產,葡萄地呷着一口葡萄酒,說曾俊華不代表中產。不過,本少爺同一班老友,就曾經諗過盡市民義務,發起清潔香港2012,出錢出力去將街上無人認領嘅雜物,送去中環派出所。點知未來社會棟樑自己玩到悶,走晒。

近來,港大法律學者戴耀廷又提出,要佔領中環。

政府總部搬咗去金鐘添馬艦,中聯辦又座落西環,點解要佔領中環呢?佔領西環,本少爺拍心口,香港人一定支持。再講,自從舊年特首選舉,大家都有眼睇:「對抗共產黨,惟有地產黨。」

點解仲要搞中環呢?參加佔領中環續集嘅未來社會棟樑,一個唔覺意,又走去反資本主義。戴耀廷話要搞萬人大「科林」,一齊傾下點搞香港嘅民主發展,但係我恐怕只會變成另一個批鬥資本主義嘅武林大會。

其實,如果香港嘅民主運動唔係咁「左」,我諗大多數香港人其實都想香港可以有呢一堵防火牆,抗拒香港赤化。之不過,香港嘅民主派,民主係手段,搞左翼思想係目的,結果就連民主運動都變成小圈子玩意。

本少爺可以講嘅就係咁多,理性嘅定義,就係目的與手段一致。如果要佔領乜乜物物係為咗爭取港人治港,請移玉步至西環,或者政總,多謝關注。

 

李兆富

Facebook Comments

Leave a comment