罷工博弈

爽報 (港聞V04, 2013.04.02)

 

碼頭罷工,是非對錯,大家自有判斷。今日,我想分析罷工博弈論。

罷工要成功,大前提係要對僱主構成大到唔可以承擔嘅代價。如果僱主頭上有政府監管,官商有面對公眾嘅壓力,罷工就更加有效。所以,生意越大,罷工就越有效。

另外,罷工要有影響力,一定要行業缺乏競爭,一家獨大。如果屬有競爭嘅行業,一家罷工,基本上等於將生意轉畀同行競爭對手,既影響唔到公眾,政府亦唔會理,最多令僱主損失些少生意,咬實牙關,轉一轉陣,又可以繼續上路。歐洲經常有罷工,就係因為好多行業都有政府干預,變相壟斷,又或者根本就係國企,政治同經濟混賬一盤。

工人罷工係為咗加人工,不過組織安排嘅政治演員,目的係要透過不斷活動,攻擊資本主義,增加政治本錢。所以,香港工潮,尤其是最近幾宗,都見到政治演員乘機抽水,主打工時同集體談判權。

工時立法,唔駛多解釋。不過,集體談判權呢五個字,好多人都唔知點解。大多數人好天真咁以為,集體談判權即係工人可以罷工唔怕俾人炒囉。錯!政治演員唔老實。見識過歐美工會集體談判權嘅人就知道,法定集體談判,意思指一旦工會宣佈罷工,抗拒指令返工者,不但被視為階級敵人,更加係刑事罪行,要坐監。

工會政治究竟目的係乜?結果係乜,明天續談。

(工會政治知多的.二之一)

 

李兆富

Facebook Comments

Leave a comment