點解反外判?

爽報 (港聞V06, 2013.04.10)

 

好多人,一聽到外判,就覺得係資本主義嘅陰謀。

當然,如果唔係有着數,資本家又點會將工作外判?但係,外判又係唔係一定剝削工人呢?根據好多社會棟樑嘅簡單邏輯,如果資本家有着數,工人就一定被剝削。

我打過工,打工生涯入面,亦有唔少日子「被外判」。嚴格嚟講,今時今日,謀生全部靠「被外判」嘅工作:寫專欄、做節目、教書、顧問研究等等。「被外判」生涯,實在有辣有唔辣,大前提係我要為自己好多事情負責任。

無錯,關鍵詞就係「為自己好多事情負責任」。反外判,最大理由就係「僱主唔願意承擔責任」。

究竟喺社會棟樑眼中,乜嘢係責任?假期、醫療、保險等,固然係資本家嘅責任,甚至乎升職加人工,佢哋都覺得老奉。

假期、醫療、保險等,全部都可以用錢衡量。「被外判」抑或企業僱員,實收幾多,都係打埋一條數。只有社會棟樑,先至分開逐樣計,好似人工以外嘅係「着數」,或者叫做「福利」。講到尾,社會棟樑信念當中,「福利」係冇成本。

絕大多數「被外判」嘅工人,例如區區在下,通常都會同時幫幾個資本家做事,亦習慣為自己衡工量值同叫價。工會想搞集體談判,外判工就係個人談判。當然,出賣勞工同腦力,最終都係睇自己叫價能力,覺得自己嘅工作容易被取代,冇議價能力,自然會反外判。不過,工會又係唔係可以提高工人議價能力?呢一點,聽日繼續講。

 

李兆富

 

Facebook Comments

Leave a comment