爽報 (港聞V06, 2013.04.15)

碼頭風雲，已經超過半個月。新聞大多數聚焦，幾個工會搶住扮代表，又或者各自叫價幾多。其實從另一個角度睇，工業行動係工會借打擊一個有壟斷地位嘅企業，去伸張佢哋背後嘅立法主張；今次工業行動主題，亦離唔開工時立法以及集體談判權。

談判，就係講策略。透過工業行動去爭取更廣大政治訴求，要有兩個先決條件。一，行業必須有一定壟斷，而且，運作不能中斷；否則就會構成一定社會震盪。二，前線員工有一定技能水平，唔容易一時三刻之內替換。

外國工會，玩呢套功夫，玩到出神入化，亦透過呢種周而復始嘅工業行動，不斷增加自己嘅話事權。過去十幾年，香港社會棟樑盡得外國左翼經驗精粹。冇幾耐之前，航空公司機艙服務員，亦係打住差唔多嘅口號。今次，同一班人亦有聲援碼頭工人，是為聯合陣線策略。假如之後有其他行業，例如大型集體運輸系統出現工業行動，大家就知道項莊舞劍，志在沛公。

資方面對呢種背後有更廣泛訴求嘅工業行動，都幾無所適從。當然，最後搞到政府介入，社會棟樑就大條道理去話：「有集體談判權去傾傾，就唔需要搞到有工業行動，亦唔會影響到廣大市民。」

基本法削弱立法機構，行政霸道，以為可以確保政府話事權，點知政治由有秩序嘅議會，走到街頭，政府更加勢弱，香港亦越來越民粹。

李兆富