爽報 (港聞 V08, 2013.05.21)

「行行出狀元」呢句說話，好多人都會講，不過，當狀元由財金轉行做巴士車長，點都會吸引唔少人講。

狀元車長，放棄三分二收入，追逐自己嘅夢想，無論如何，都值得大家討論。當然，講法背後，亦無可否認，好多人仍然有先入為主嘅諗法，就係有啲職業，比起其他更加高級。畢竟，香港主流仍然覺得返寫字樓工，着西裝打呔，好過出賣勞力，狀元車長亦因此係新聞材料。

亦有人話，呢次係巴士公司成功嘅公關策略，非常厲害。事實上，我睇過狀元車長嘅應對，確實係巴士公司代言人不二之選。更有人話，周圍都有工會講緊集體加薪幅度呢個敏感政治題目，巴士公司一招轉移視線，精妙到要寫入企業傳訊教科書。

從社會角度睇，狀元車長反映幾個現實：一，好多學生都追逐同一種目標，要大個仔先發覺浪費好多光陰；如果一早認定車長係終生職業，又點解要考九支A。二，話說回頭，狀元車長話「錢幾時都搵到」，其實佢比別人叻，係因為佢有選擇，呢個先係重點。

我最希望狀元車長可以好好用自己嘅才幹，唔單止做車長，由基層一直做上去，服務公共交通，喺另一個層次為香港人創造價值。呢一代香港人要踏實嘅故事；行行出狀元，唔係由始至終都做死同一件事，而係不斷有進步空間。在此，謹祝狀元車長前程似錦。

李兆富