金手指:倫敦樓貴到癲

蘋果日報 (財經要聞B09, 2013.11.05)

 

前幾日,孫柏文去咗倫敦探喺英國進修嘅女朋友,我哋傾出年搵樓住嘅情況。我一聽就呆一呆,因為租間喺大學附近嘅開放式單位,郁啲都月租過萬五港元,如果要新淨啲或者啱啱裝修過,仲要過兩萬。呢個價仲要係最低價,唔係中位數。佢有次同《經濟學人》嘅前編輯傾計,佢話呢幾年租金不斷上升,仲戥佢同佢啲同學慘。倫敦樓價高,原來唔係乾升,而係有租金嘅支持。

根據女朋友研究,如果要住平啲,即係低過一萬蚊一個月,就要住喺搭程地鐵起碼要半個鐘嘅地方,仲要未計行去車站同等車嘅時間。好似屯門站出市區理論上只要半粒鐘,不過如果你住蝴蝶灣,出西鐵站都半粒鐘。咁身為一個既想上堂攞高分,仲想課餘飯後結交朋友、聽啲高人講talk吹水嘅學生,點搞?同讀離岸課程有乜分別?

其實倫敦租金升嘅主要原因係移民湧入,因歐盟協議,喺鐵幕倒下後嘅東歐國民,自90年代尾開始不但可以去英國住,仲可以享有英國國民所有福利。喺對上15年間湧入英國嘅東歐人口,係之前1,000年移民人數嘅總和。而對倫敦樓價最有利嘅地方,就係呃福利嘅新移民,因嫌倫敦物價貴,攞到嘅綜援唔襟使,所以唔住倫敦。而有團火嘅新移民,就多數留喺倫敦搏,寧願幾個人瞓碌架床都要住劏房,令到租金急升。

 

獨立黨選情牽引樓價

不過呢個利好因素將會有大挑戰,因為全球主流傳媒都當冇到、主打反對移民嘅英國獨立黨(UKIP),喺民意調查同國會補選中,已經挑戰緊保守黨同工黨。未來兩年將會有好多選舉,UKIP如果贏唔到,就係因主流政黨偷佢哋限制移民嘅政策。一但真係限制移民,倫敦樓價最有利嘅基本因素就會消失,到時樓價會岌岌可危。衣家喺倫敦買樓畀喺當地讀書嘅仔女嗰班家長,唔好唔跟UKIP消息啦。

 

孫柏文

獨立股評人

http://facebook.com/shuen

本欄逢周二刊出