1529316279_d3c4

在港的美帝劊子手

蘋果日報.金手指/2018-06-18/孫柏文(獅子山學會董事)

《在港的美帝劊子手》

老實講句,孫柏文真係睇唔起香港啲藍絲。政見有唔同,就算唔支持你嘅方向,我都可以尊重。呢種情況,我對某啲黃絲都係一樣。

例如張超雄,坦承話用香港貧窮線計法,如攞去北韓,北韓係冇貧窮。呢啲我咪尊重囉。唔似李卓人,問親佢同一條問題,都slimy 到嘔,左閃右避,係永遠唔會直接答你。

咁藍絲一向話我哋係中國一部分,主權有如南沙群島般不可被外國侵犯。佔中、旺角掟磚等全部外國勢力催使,所以要通過廿三條。

講真,你班藍絲係咪真係咁堅定對付外國勢力先?因為今日我想介紹,一個喺香港落實美帝帝國霸權政策嘅劊子手。佢就係金管局。

喺四月美帝話要制裁俄鋁(486)一役中,已經見到美帝點樣透過金融系統,去侵犯他國主權及利益。一張memo,要你跪低,讓出國家利益。

喺香港,美帝一句:「打啲得我覺得係黑錢嘅戶口。」金管局就好似中學prefect,聽到校長一句後,瘋狂做嘢。搞到週末本報出現嘅嗰單新聞,話一個阿姐,無啦啦被恆生銀行要閂戶口。

講真,以前金管局仲會勸大家硬食美帝霸權,因要打販毒、「恐怕主義」等。今日,美帝根本唔係打呢啲,淨係對佢有貿易順差,已經係敵人。死嘅,就係美帝劊子手金管局打嘅香港人。

香港人好清楚見到㗎。所以中聯辦、林鄭月娥、藍絲如果想先贏黃絲嘅尊重,首先貫徹落實反外國勢力干預先。由向金管局開刀做起。唔敢?咁你明點解睇你唔起啦?

Facebook Comments

Leave a comment