陳茂波是否蘇斯克查

蘋果日報.金手指 /2019-02-12/孫柏文(獅子山學會董事)

呢幾年,孫柏文成日用曼聯比喻香港。殖民時代嘅香港,就係費格遜之下嘅曼聯。贏,就當然。不過最緊要係骨幹係靠班由幼練到大嘅人,例如碧咸、傑斯、史高斯,再加啲因性格太獨特,其他球會容不下嘅鬼才,例如簡東拿。
而呢個組合產生咗令其他人既羨慕,又討厭嘅霸氣,swagger。

費格遜走咗,就換咗個之後任期做唔完就被炒嘅莫耶斯。跟住就一個來穩定局勢,諗都未諗過會做曼聯領隊嘅雲高爾。到佢任期完咗之後,就到「好打得」嘅摩連奴。如果我同你講,有個領隊將會帶領你隊波喺英超排第二、踢歐冠、天文數字嘅收入,99.999%球會嘅fan屎都會話呢個領隊好嘢!不過雖然摩連奴真係上季帶領曼聯做第二,不敵佢「鄰近地區」嘅曼城,曼聯迷都係非常不滿摩連奴。

不但冇贏,仲要係俾人笑嗰種極消極,冇霸氣嘅踢法。淨係得「好成績」係冇用,要贏又要威先得。而香港?好多嘢都眼冤,係因我哋心中都話:「我哋係香港呀!咁水㗎!」點知兩個月前,曼聯炒咗「好打得」,搵番全線冇人睇好嘅蘇斯克查做「暫做領隊」。蘇做球員非頂級,做領隊非一流。點知喺佢執教嘅11場波,贏咗10場。最緊要係踢費sir式霸氣波。球迷歡喜若狂,連舊球員都話:「我記憶中嘅曼聯返來了!」

咁點解我話財政司長陳茂波(波叔),就係我哋嘅蘇斯克查?睇啲人點鬧佢推四千銀派錢,用三隻字總結,就係話佢「跛腳鴨」。你諗住我今日係曲線鬧佢,你就錯,我係真.讚。下周再解釋。

Facebook Comments

Leave a comment