英鎊前路確難測

蘋果日報.金手指/2019-12-16/孫柏文(獅子山學會董事)

早兩個月前,孫柏文喺本欄做過好幾個關於英國嘅預測。上周英國舉行大選後,係時候睇返中咗幾多個。

首先,我話過10月31日嘅脫歐限期,一定被推遲。先中。

跟住我話過嗰班當時賴死唔走嘅國會議員,將會喺脫歐限期推遲後,卒之批准大選。中。

而我話過硬脫派將會喺選舉大勝。呢個既中又唔中。原因係保守黨確實大勝,而佢哋雖然話會有同歐盟嘅協議(即近乎一切照舊,好似冇脫過咁,直至傾掂未來關係)下脫,不過亦同時話要歐盟破晒佢哋嘅速度紀錄,喺一年來傾掂未來關係。咁傾唔掂時,2021年1月1日會點?又硬脫?定係又跪低求延期?

最難測係因英揆約翰遜係超級牆頭草,完全冇原則。又鍾意用花言巧語,搞gag當做咗。喺咁嘅領導下,真係冇得估啲政策會點。

而喺之前同一篇文中,我話過叫大選嗰刻沽鎊,到市場覺得硬脫派會贏,令英鎊大插之際就平沽轉揸睇升。不過當牆頭草做首相,風向難測,未來可由硬脫至只係紙上假脫都仲得,英鎊走勢亦難估。

最後,如果英國走在美國前,當年脫歐公投爆冷成侵侵當選先兆。美國民主黨而家走緊英國工黨路線。即陶傑日日吸濕大笨象般抽嘅咩多元文化、乜都免費等新左膠主義水。而民主黨內唔信新左膠主義嘅嗰批人中,拜登輸硬。唯一有得同侵侵隻抽嘅,就只得Buttigieg。大家自己去睇吓佢乜水。

Facebook Comments

Leave a comment