今年財政預算案，是十五年來首度出現財赤，政府預測未來五年預測都係赤字。網上世界當然主要論到一萬蚊措施上。

首先搞清楚，政府錢，係透過強逼力抽納稅人的稅項而來，庫房啲錢，放喺政府度先，有需要先拎出嚟用，係市民嘅。講成「派錢」，唔單止誤導，仲幫政府面上貼金，講到佢好似父母官咁，但其實佢只係業主立案法團，打緊市民嘅工。

今年出現財赤，香港一直掛喺口邊嘅財政儲備亦由22個月政府開支，一縮縮到16個月，政府過去一路只係諗點分錢分得最少民怨，一路過緊Happy Problem，根深蒂固嘅問題，例如開支，應該借呢次財赤，去檢討點樣控制開支。

近近哋星期五，立法會開會討論公務員加薪。喺全港一片抗疫Home Office，官員口口聲聲話市道低迷、差過沙士，民間好多企業都已經紛紛凍薪或高層提出大幅減薪，以應付經濟寒冬，飯碗隨時不保之際，竟然可以有個議案，係公務員加人工，仲要係鐵飯碗嘅公務員，呢個舉動，係咪太過脫離現實呢？亦都反映咗過去政府財政太豐厚，只係諗到點使啲錢，一旦遇到逆境，完全冇應變能力，只係機械式咁推進既定議程。

參考03年沙士襲港時，提出在公務員全體凍薪或減薪，以控制公共開支，協助解決財赤。我想信依家暫緩公務員加薪，應該係大條道理，高官甚至可以率自我停收薪金一年，成為公務員團隊嘅榜樣。開此先例，將來再檢討部門人手嘅必要性，控制開支。情況就好似近期疫情咁，零售飲食生意開支越大，逆境越困難；控制成本做得越好，日後再遇逆境，衝擊就嚟後較細。

其他千億基建亦都係令人費解嘅項目，特別依家開口埋口講財赤，明日大嶼更加係高成本，時期長，可以預期必然超支，工程期長亦將面對跟屆時實際需求脫節的問題，本會認為，土地發展應按市場而定，包括簡化及放寬貨櫃碼頭、粉嶺高爾夫球會、農地等改變土地用途的規定，並放寬地積比率，以市場的方式決定供應量，補地價亦可增加財政收入。

有記者喺預算案記者會問及，「擔唔擔心繼續推進明日大嶼會影響香港財政」，波叔答「撥款係做研究，香港土地供應緊張，增加土地供應係重要，但根本性要解決土地不足形勢，就要做果斷嘅動作….財務上會喺研究上睇埋，唔會做啲負擔唔起嘅嘢」，更加果斷，係即刻煞停佢，言行合一，真係針對財赤進行改革，而唔係望天打卦覺得今次會好似沙士完結之後，會自動見底反彈。見底還見底，反彈還反彈，兩回事。

好多人已經留意到，世界經濟已經慢慢出現新秩序，與其話十五年來首度出現財赤，不如話之前十五年政府收入來得太容易。新秩序會發展成點冇人知道，但只要政府規模夠細，干預市場少之餘，控制政府開支，就唔會跌入債務漩渦，衝擊過後翻身都會比其他經濟體快。財赤係一個改革政府開支嘅契機，不過今次財政預算，似乎仲未有任何改革嘅思維。

祝越山