蘋果日報．金手指／2020-06-09／孫柏文(獅子山學會董事)

孫柏文今日睇到David Webb喺佢網站披露佢有病嘅事，真係覺得好傷感。不但因為佢係個勁人，仲要係香港成為香港，一路散發嗰種世界領先大都會嘅浪漫，就係歷年來都有Webb兄呢種奇人異士，自發咁選擇聚喺呢個福地。

我每次睇X Men嘅電影，雖然每個角色都有佢哋嚴重嘅性格缺陷，甚至被世人排擠。不過最後搵到X Men學院落腳後，成為充滿色彩嘅故事主角。而以前嘅香港，其中一個最重要嘅特質，就係一班來只五湖四海，鬥心極強嘅人，聚喺獅子山下。

我哋就係真人版嘅X Men學院。

希望佢大步檻過，亦期待佢再重出江湖！Get Well Soon David Webb！

2020年雖然一半都未過，不過好多大家都覺得「永恆不變」嘅定律，都喺今年出現劇變。如果你話下半年真係有兩個有核武嘅國家開拖，對市場參與者已唔係黑天鵝。當英國會考慮畀BNO持有人居英權時，城中核爆會幾出奇呢？

咁如果市場都開始有咁嚴重嘅預期時，澳門收返幾個賭牌，又可以會幾震撼呢？啲發鈔銀行冇得再喺香港做生意，又會幾咁奇？

保持最高機動性，隨時能走位。各位，過到呢關就真係會有大把世界玩了。期待。