am730 (大明燈 M36, 2011.7.27)

花旗國國會通唔通過到「提高政府借錢上限」方案，已成全球投資者嘅焦點。有唔少人，話呢次危機係一個「造」出來嘅危機。

孫柏文每次聽到有人咁講，我就忍唔住問：「如果花旗國呢次係『造』出來嘅，咁唔通『自然衍生』嘅信貸危機先好？」

今次係因為花旗國國會自行限制借貸，可能令政府還錢出問題，唔通要學希臘咁，要市場、債主唔肯再借俾你，成「自然衍生」嘅信貸危機先好？

如果借貸、債等有如毒癮，國會就係嗰個肯喺死前求助，希望搣甩條癮嘅癮君子。一個國家政府步Amy Winehouse 嘅後塵，唔通真係咁可取？由06年，前英國首相邱吉爾有句說話開始廣傳，我自己都成日引述。佢話：「美國人一定做『啱』嘅事，不過要試晒其他方法先。」去到呢刻，美國人差不多已經試晒其他方法，國會炮製呢個危機，如果成功減低開支，唔係只做啱嘅事咩？

如果你想用你本凱恩斯經濟學同我講，政府呢刻減開支有幾咁唔好，算吧，你哋已經有幾年時間，睇吓你哋周圍，work咩？

點都好，預測就一定要做。首先，8月2日前，有好大機會通過唔到「提高政府借錢上限」方案，因為白宮已經開始安撫啲銀行家，話到嗰日都通過唔到方案的話，都唔會default走數。

假設通過方案的話，之後美國國債息率應該會大升。

點解？你可能會話消除咗呢個走數嘅危機，冇理由之後反而更令息口回報上升。其實，好似嗰啲識啲唔識啲嘅學棍話齋，真係供求關係。

大家要記得，花旗國借貸上限一早喺5月已經到咗。個比喻似一家人冇錢使，老竇想再申請多張信用卡，個阿媽唔俾。老竇唯有喺小朋友個錢罌「借」住先，起碼攞來交卡數min pay同水、電費。

依家美國政府已經問，例如公務員退休基金等「錢罌」，「借」咗超過3,500億美元，淨係要發呢批新債，仲要冇咗量化寬鬆，邊個買呢？長息仲唔扯高？

其實，今次真係一個國民教育好好嘅一課。美國國會同行政機關人員嘅任期，先有總統嘅4年，再有眾議院議員嘅兩年，最後有參議院議員嘅6年，仲要參議員每兩年先換三分一，點解呢？

理由就係，當一條法例可先通過被迫走在民意最前線，每兩年就要選嘅眾議院，同設計上非常保守嘅參議院，呢條法例應該係好法例。亦同時可以令08年勝出嘅總統，因為做得唔好，聽去年選出嘅眾議院說話。

講真，淨係憑呢個憲法安排，我哋中國人借錢俾佢哋，遠比借俾其他人好，希望邱吉爾嘅說話快啲靈。