「沙士價」不是因沙士

蘋果日報.金手指/2020-02-04/孫柏文(獅子山學會董事)

孫柏文以前做投資講坐講者時,有時會有問答抽獎環節。我就即場諗啲問題問觀眾。答啱,有禮物。

其中一條我最鍾意問嘅問題就係:「大家都聽過沙士價。咁根據一週計一次嘅中原指數。香港樓市究竟喺03年邊個禮拜見底?」問咗咁多年,都係冇觀眾答啱過。

武漢肺炎消息不絕,令好多財演行家,喺對上兩週寫樓市會否再現「沙士價」嘅文章。清一色話唔會。

佢哋嘅分析,我覺得全部都係唔明當年點解出現「沙士價」。首先,唔係因啲人驚隻病,所以終極賣樓(淘大除外)。

大家要記得,97年所有香港人,都信「我至叻」。我哋做嘢不但世界級,重要係領先世界。迷信成個體制嘅利害。點知由97年開始,政府一次又一次證明唔掂。

直至03年,透過沙士一役終極證明連最基本,防止傳染病都做唔到時,徹底令香港人醒覺。原來用中共嗰套「港人治港」去延續殖民時代獨裁唔work。所以一注獨沽啲樓。

而中央都覺原先嘅諗發唔掂。所以就逐步取締「港人治港」,越來越干涉,埋下「反送中」嘅計時炸彈。

我最驚嘅就係就算你幾「黃」都好。如果今次武漢肺炎真係令全國人民對中共管治嘅信心全面崩潰,中共「支爆」。香港樓,或香港資產會點?中國冇中共,有冇plan B?重要呢條問題係假設隻病同沙士一樣,唔係死段百萬人咁收科。

最後,香港樓市喺03年邊個禮拜見底?就係當年七月,圍立法會推倒廿三條立法嘅嗰個禮拜。香港人卒只證明,中央、政府亦接受,原來香港人有底線嗰刻。大家執生。

Facebook Comments

Leave a comment