話識睇的是呃你

蘋果日報.金手指/2020-06-02/孫柏文(獅子山學會董事)

做財演咁多年,孫柏文都從未試過好似今時今日咁,個腦chok唔到個「可見的未來」出來。

一係咁講,唔係話做唔到預測,而係最好同最壞嘅路實在差距太大。仲要每個可發生嘅情況,睇唔到機會率有幾高。

呢幾年來,個勢係肯定局勢會越來越緊張。不但可測到多年強調話唔會變嘅遊戲規則會變,仲要各項資產嘅價格完全冇反映到呢個未來。

不過去到呢步,仲有啲乜係可以信賴唔變?一國兩制都正式釘蓋,咁聯滙呢?我諗,最可信賴唔變嘅嘢,就係我國偉大中央,就算唔係呢鑊逼到全世界同佢反面,就會視他國為「紙老虎」再步步進逼。直至有一鑊出事出到冇得掹返轉頭。仲要事態發展嘅速度,由以前一兩年搞一鑊,到今時今日,日日新鮮,好快就達「臨爆點」。

美帝呢刻,全國近乎內戰般,烽火四起。多年印鈔嘅結果,係足以被證明控制資產無能嘅人,一次又一次被救,冇被換掉。總體效率,每況愈下。仲要係冇能力借錢去玩呢個遊戲嘅人找數,即後生仔女。遇上他國放病毒,民情會如何?

如果愛因斯坦話「利叠利」係宇宙最強之力量,我就話「美國民意」排第二。永遠都非常分裂的社會下,如真係出到共識,仲要槍頭係指住你,大鑊。

最後,事到如今我係有嘢安慰。香港內部人心、動作嘅矛盾應大幅降溫了。因為將會發生嘅事,無一港人能再左右。建制、獨派,藍或黃,力量有如1938年嘅捷克人一樣了。

Facebook Comments

Leave a comment