給末代高考生的信

爽報 (財經V41, 2012.7.27)

 

各位,如果你已經有大學收錄,恭喜。未來幾年,希望你除咗享受大學生活,更利用更大嘅人際網,學習成為一個成年人。中學,來來去去都只有一班同學;大學,你將會接觸更多同齡陌生人,呢個將會係你終身最受用嘅技能。

不過,如果你未有大學收錄,我明白你會好無助。你可能會想去讀個副學士,因為重讀已經無可能,明年考得再好,都唔會有大學收。不過,我希望你會諗清楚以下問題:

一,如果你覺得有學位就一定有份工,有穩定收入,請你打消呢個念頭。大企業,程序上會用學歷篩選,但係畀你入到大企業,唔代表你日後平步青雲,亦唔代表有終身聘用。事實證明,穩定收入已經唔存在。至少你呢代人,就業模式將會同上一代好唔同。

二,如果你覺得無學位,僱主就唔請,亦請你改變呢個想法。如果有個僱主,又唔係乜野大企業,但又扮晒野淨係睇履歷唔睇人,呢類公司好極有限。我認識好多僱主,唔介意學歷,更加係求才若渴,你有心做,有心學,我會建議你?家就去搵工。四年工作經驗,一定有優勢過這一張甚麼副學士加個銜接學位。

當然,如果屋企有閒錢可以畀你去外國升學,亦未嘗唔係一條出路。不過,請你記住,多謝父母。

 

李兆富

專欄電郵:SharpHK.Simon@gmail.com

Facebook專頁:www.facebook.com/AppleSimon

Facebook Comments

Leave a comment