趕最後一班賊船

孫柏文- am730 (大明燈, M27, 03/01/2010)

由2006年孫柏文入行做財經演員起,風平浪靜嘅日子就唔真係多。就算係海嘯未爆之前,淨係大嗌大浪將至,都嗌到聲嘶力竭。不過,對上幾年嘅風風雨雨,對我來講真係學到唔少嘢。例如,各國高官負責任咁做政策決定,係難上加難。面對困難時,往往都會用權宜之計,過咗骨就算。

 

多唔使講,攞愛爾蘭做例子。佢哋在海嘯前做晒「啱」嘅嘢,例如政府財政要量入為出、低稅率及其他歐洲國家眼紅嘅自由經濟政策,令愛爾蘭經濟急速增長,社會向榮,人皆有賺。

不過,喺人性能自由發揮嘅地方,貪婪、恐懼就會不斷呈現,投資泡沫也會隨之出現。而喺愛爾蘭,樓房市場成泡沫出現之處。泡沫,本身只係人類希望嘅結晶體,每個買家用事後覺得係瘋狂嘅價錢買資產,對眾人皆醉你獨醒嘅人其實冇乜事。

嗰啲高處未算高嘅炒家,如果用自己嘅錢買,輸咗就係佢自己嘅事。如果係借返來買,就係佢同佢債主嘅事。而如果債主係銀行,銀行又資不抵債嘅話,銀行應該執笠。

不過,永遠都係最後呢步,各國高官們唔敢落實。甚至有咁嘅膽量都好,眼見鄰國一句「政府包底」就可贏盡掌聲,俾銀行執笠真係要無比堅定。起碼,愛爾蘭暫時沒有勇氣令銀行執笠,繼續要政府包底。

今日又要舊事重提,係因為要同大家講一個不但容忍銀行執笠嘅國家,重要係未出事前,已會積極踢門封艇。呢個國家係邊個?就係1月1號趕最後一班賊船,成為歐元區最新成員嘅愛沙尼亞(Estonia)。

當年1992年,蘇聯解體,愛國就選咗個32歲嘅國會議員成為佢哋嘅總理。

呢位總理叫Mart Laar,上任被訪問時,問及睇過乜政治書時,佢話只係睇過一本,就係七十年代尾面世,書中讚到香港甩轆,佛利民(Milton Friedman)寫嘅《Free to Choose》。

Lars話到明「淨係」睇過呢本書,上台後就落實咗唔少港式政策。例如低稅率、簡單稅制、近乎零關稅、自由貿易和將貨幣同德國馬克掛鈎等。

不過,最厲害必定係上台後,派大批人員查銀行啲數,發覺有問題就執咗間嘢佢。結果係喺愛國嘅銀行,冇一間係本地行,全部都係外國銀行嘅本地分行。

試諗吓喺特區嘅話,不論係逢係保皇黨或吓吓反對派,有個政府好唔俾面咁剷平有問題嘅銀行時,令到再冇本地銀行。你話個經濟盲涂謹申又會要求政府點?

點都好,就係因為愛國比香港更香港,又會以低債身份入低息歐元區。愛國今年資源價格應該會升得好勁,你有錢又得閒嘅話,不妨去愛國shopping買資產啦!

(作者為前石油業證券分析員,視股市為終身學習場所,不斷交學費。)

Facebook Comments

Leave a comment