am730 (大明燈 M38, 2011.9.7)

呢個星期，原本好悶，疊埋心水等美國總統奧巴馬講嘢，預咗個市會沉呀沉，再迫政府做嘢！但你做初一，我做十五，市場迫緊政府時，政府何嘗唔係推啲無謂政策？搞樓市，定期推地，仲要推限呎、限量地，驚發展商唔死！賣地得小貓三四隻，時間係賣得長，但個個都面有難色，在想投與唔投之間，你話係邊個嘅錯？即係咁，唔俾人發水，又或者咁講，最多發10%，講真，點夠起個Clubhouse？咁嘅樓盤，你有冇興趣先？

好似減肥咁，你要孫柏文減，冇問題，但你俾個Clubhouse gym我。可能話有個健身室你都唔會去口架啦！不過連健身室都冇，我咪有嘢賴？個健身室唔係俾我減肥，佢嘅存在係為咗提供一個希望。冇希望嘅樓盤，唔怪只賣得4,000蚊有找。政府出招推得咁絕，10月又要居屋死灰復燃去益本應要搬走嘅公屋富戶，夾硬做嘢攞票，呢一招，你諗清楚未？其實，市場都係買希望啫。

香港係咁，歐洲又係咁，仲要衰多十錢重！歐洲同特區有樣麻煩嘢叫法治，德國憲法法庭將裁決歐盟救助機制(EFSF)係咪違憲，若裁定違憲，真係忍着淚向希臘甚至歐元say goodbye，到時歐洲又有個大風暴。

你話如果德國跟我哋行基本法，你話幾好，咁大件事，走去釋法咪搞掂囉，唔使好似依家咁綁手綁腳。法治？真唔方便。當然條憲法係為咗德國繁榮同安定所以先咁寫，不過繁榮、安定？呸！

要歐洲跟我哋，簡直係笑話，未必要學我哋釋法咁唔直接，要繞過法治呢項麻煩嘢，令借貸過度、不負責任嘢政府們繼續揮霍，歐洲央行印銀紙就得。講到不負責任嘅政府，就一定要講今個月將要rollover國家歷史最多債嘅意大利。佢哋個財長，呢啲咁高職位的人，到最後，咪同公司小職員一樣，日日睇阿頭面色，左右做人難。講緊嘅就係Tremonti，特雷蒙蒂。想甩身又甩唔到，隔籬啲partner，日日叫佢唔好走，搞掂個削赤問題前，都唔好執包袱，因為唔通將個波交俾老頂貝盧斯科尼咩？

貝叔揸旗只會將意大利送上斷頭台，或夜晚clubbing搵個「少女模特兒」做佢手下，債息再高都唔理。與其係咁，Tremonti呢一下，都係騎虎難下，誓要搞得掂先可以起身。估唔到做財長，表面風風光光，到最後，咪又同平民百姓，天下打工仔一樣，有個胡混老闆，想做好份工都幾難！

另外，近來聽到有政黨再吹噓6,000蚊唔夠使，想施政報告開多張大支票，人人俾多6,000！我好想講派錢同食毒品一樣，「不可一、不可再」，首次派已引起各界聲音，新移民又有，點拎法又大肆報道。首批未到手仲要第二批？用派錢真係可解決大部分問題咩？試諗以前港人覺得「阿燦」係落嚟食40個漢堡包搏命向上游。依家？反對住夠7年攞居港權。點解？哎。