金手指:林峯攞獎背後的管理啟示

蘋果日報 (金手指, B07, 2012.1.19)

過年前,孫柏文同利世民傾我復工嘅嘢,我就問:「你估我上次咁樣炒鑊甘,仲有冇得做電視?」一問,世民話:「電視呢行應該係meritocracy,你係『得』嘅,就有人會搵你。」我心諗,即係叫我死咗條心啦!不過我就話:「就算我真係收得,都有個台唔會搵我,因為唔覺要talent!」世民諗一諗就笑住答:「TVB?哈哈!」

用金曲金獎挑戰底線

攞電視廣播(511)嘅TVB來笑,我呢代人或更後生嘅喺1月初都經常做。點解?因為就算好似我呢啲劇集、娛樂節目完全唔睇嘅人,呢幾年1月初開facebook,就會忽然見到啲朋友,好似洗版咁百樣人講同一樣嘢,就係:「林峯?noooooo!憑乜呀?」因為呢幾年,TVB都喺年初勁歌頒獎禮封佢做「亞太區最唱得男歌手」。今年仲要俾佢隻《Chok》攞埋劉德華同郭富城都未攞過嘅「金曲金獎」。

我喺Facebook上對TVB點解會咁做就有好多理論,例如因同唱片公司講唔掂數,所以要夾硬捧。不過所有理論,都係建基於TVB雖覺咁做有問題,不過冇選擇或希望啲人唔係好覺。呢啲理論,我完全唔同意。

有朋友話,TVB好似聯儲局,八十年代嘅勁歌獎,就係Volcker嘅聯儲局,依家啲獎已量化寬鬆(當然,新城直情係津巴布韋央行)。不過同美國10年國債係兩厘一樣,點解TVB嘅收視仲係咁硬?我係信有慣性收視呢樣嘢,呢個係TVB歷代台前幕後努力儲埋,同美元一模一樣。

其實,我覺得電視廣播嘅管理層,係明知咁樣攞林峯出來會有極大反響,都特登咁做,原因就係要試。為乜?大家都知舊年初,電視廣播嘅控制性股權轉手,有如聯儲局換主席。如果我係新話事者,其中一個我想知嘅就係,我買來嘅資產,個個都話有「點都唔會走」嘅客,咁啲客對公司嘅支持有幾堅定?亦即似伯南克問:「QE做到第幾期你先放美元、美債?」

如果舊年1月尾我同你講,2011年中林峯會有隻新歌,而呢隻歌將會成TVB全年金曲,呢件事雖離譜但非意料之外。所以,電視廣播新班主就出林峯隻《Chok》,一隻冇可能贏嘅歌,去探慣性收視嘅底線,即係一場壓力測試。你嗰班師奶,就有如中國中央政府咁,一路鬧咪一路唔改習慣。

《Chok》出街後TVB跌不停

當然,為長線做咁嘅壓力測試係有代價,因為啲人聽完《Chok》,係難明點做金曲。第一,因為係同一個頻道播,咁樣摧毀誠信,就會連累其他節目嘅誠信都一齊跌。輕則唔信間餐廳隻雞有雞味,重則新聞被視為CCTVB。

第二,就係啲唔聰明嘅投資者,睇唔明你玩緊「皇帝的壓力測試」,開始拋售你隻股票,所以喺林峯《Chok》舊年中出街後,電視廣播股價嘅走勢就冇運行。

如果我個理論係真,林峯其實好無辜,同JP Morgan嘅Jamie Dimon一樣,冇話要你幫,係都要塞啲嘢來,搞到有「佔領XXX」嘅怨憤。

孫柏文

獨立股評人

本欄逢周二、四刊出

Facebook Comments

Leave a comment