爽報 (財經V25, 2012.2.14)

如果你係經濟人，你好難去推翻：「送禮，最實際就係現金。」

道理好簡單，舉個例：假如你個女朋友（或者老婆）覺得個手袋好抵，佢仲唔一早走到去買？佢唔買，就係因為佢鍾意，不過覺得個價唔值。所以，就算你真金白銀送畀佢，佢都一定唔會去買呢個手袋。但係如果你送個手袋畀佢，雖然過程中間有少少價值耗損，不過，重點係你用行動去話佢知，你知道佢鍾意乜。

「乜女人咁煩！點解要男人做咁多野？」好多男人都唔明，點解女人好似咁唔理性。

從人類學角度，女人要十月懷胎，之後又要錦乾絮濕將小朋友湊大。男人對下一代付出嘅，可以少到只有一半嘅DNA。所以，由古至今，絕大多數嘅風俗裏面，都係由男人提供物質同保護。其實除咗人類，好多生物都有呢種現象。去到現代社會，雖然無獅子老虎大象，又唔需要去打豬打鹿搵野食，但係呢個基本關係，已經好似程式咁，設定人類行動。

情人節，只不過係畀機會各位男士，用行動表達自己對另一半有幾咁願意花時間。

 

根據美國零售業大聯盟統計，今年每對美國人約算平均花費美金126.03；當中，男人平均約算168.74，女人就只有85.76。其實，我覺得咁都已經算係男女平等架嘞。另外，雖然71%男人打算送花，但係只有36%女人會買花送畀另一半。調查又發現，今年美國人情人節用最多錢，原來係買首飾，估計消費額高達41億美元，係歷年新高；鬼咩，金銀價格升左咁多，唔創新高先至奇。我有理由相信，買首飾，絕多數係男人。講到尾，男人都仲係好實際。

講到實際，我有個朋友，啱啱買咗條銀條，諗住今日送畀佢位靚太。「好唔好買Hello Kitty首飾呢？」其實呢位朋友都有諗過浪漫些少，點知，咁啱白銀戰隊孫柏文在場搭訕：「梗係唔好啦！隻貓頭公仔有溢價架，買銀最好買銀條。」就係咁，我位朋友，情人節變相就送現金，希望阿嫂都會歡喜啦（要怪，怪肥孫好啦！）。

最後，亦最重要，我要借呢個少少嘅欄位，同身在遠方嘅老婆講聲：「情人節快樂，我愛你！」。有時候，好多野，真係講份心意。

利世民

專欄電郵：SharpHK.Simon＠gmail.com　
Facebook專頁：www.facebook.com/AppleSimon