爽報 (財經V35, 2012.3.08)

噚日，澳洲公佈去年第四季GDP。結果，增長差過預期，係經濟分析師預計嘅一半。有睇開呢個欄嘅讀者都知道，我一向對呢一類預測，甚至乎統計數字，都抱住「姑且聽之」嘅態度。不過，由於呢幾日撞正兩會，溫總公佈政府工作報告，又講到今年GDP增長目標放棄保八，兩件事一併起來，天衣無縫，結論就係：中國經濟正在放慢步伐。

記得大半年之前，歐洲出事，好多人除咗寄望德國會願意出手救窮親戚，更有一個天方夜譚，就係話中國會增持歐債。講咁耐，講到大陸都經濟步伐放慢。另一邊廂，歐洲經濟亦都正式進入寒冬。除咗出晒事嘅歐豬，就連一路以來跑贏嘅幾個國家，例如德國荷蘭，都已經出現若干程度滯脹。我真係好懷疑，究竟大家一直期望歐洲問題可以透過處理好內部矛盾，最終得解決，係唔係有少少超乎現實。

QE3無着落 金價即插

講番澳洲。前日，澳洲聯邦儲備銀行決定維持利率不變，不過，個別成員銀行就輕微上調利率。我個人解讀，就係澳洲一樣有個別地區，通脹情況仍然嚴重。有個剛剛從澳洲WorkingHoliday返來嘅朋友講，當地物價貴到嚇死人，簡簡單單一條香蕉都可以賣成廿幾蚊港紙。當然，除咗香蕉之外，其他嘢一樣貴到無朋友。

但最詭異係，Bloomberg做咗個即時調查，問一班經濟師，結果係有四分一人預期下個月澳洲聯邦儲備銀行會減息。尤其是當上年第四季GDP數字出來之後，減息預期即時增加，澳元亦都即時弱勢。

呢兩晚，另一個好明顯嘅現象，就係金價繼續落。記得上星期伯南克話通脹預期上升，QE3無着落，金價即晚插咗過百美金。其中一個好多人信嘅神話，就係澳洲出產黃金，澳紙升，因為市場對黃金需求升。當然，同樣道理亦通用於掉轉頭嘅情況。

順帶一提，金甲蟲話係央行使橫手沽期金，目的就係要掩飾紙幣失信嘅現象。我就比較接受簡單嘅講法，黃金有一班投機者，見QE3無着落，即刻笠水。黃金現貨價，已經唔單止係通脹預期咁簡單。

其實我一直有個問題：歷史上，黃金同白銀價格，都有個比例，但今次明顯黃金價格遠拋離白銀。究竟係白銀價格真係為被操控？定係黃金價格有泡沫？

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon