大洪水生存三式

爽報 (財經V38, 2012.9.20)

 

「買金你就話係攬水泡,搵錢就係學游水。如果係大洪水,真係要有水泡先得喎。」朋友話。

其實兩者無牴觸。純正金甲蟲同價值投資派,都贊成財富組合一定要有唔同資產。金應視為現金,故一注獨贏買金變相係100%現金;價值投資派就認為,除非極度絕望,否則唔應該少少生財資產都唔持有。用水泡做比喻,100%黃金就等於只有水泡,唔識游水。

不過無論大洪水點樣來臨,我覺得有兩個準備,幾時都可以開始做:一,減磅。好時好日,大家唔覺有乜負累。當出現衰退,今日享受慣,他朝就好唔慣。債同奢華嘅享樂,就好似綁啞鈴上身。今日大家日日坐順風車,當然唔覺有幾重,但有日要落水游,多一斤就係多一斤,可令人非常疲憊。二,秘撈當做Gym。財務上Keep Fit,除減磅,就要增加動力。跑步,係增加血嘅帶氧能力;秘撈都一樣,唔係為咗少少錢,而係要養成發掘機會搵錢嘅習慣。三,儲糧。唔怕一萬,最怕萬一,大家都要諗吓,假如最壞情況下,有半年至一年家庭會冇咗一半、甚至更多嘅收入,儲蓄夠唔夠開支?如果唔夠,請回到上面兩點。最終目的,應該係可以做到一年冇正職都捱到,應可以算係安全。

我認,我係一個悲觀嘅人。悲觀嘅好處,就係如果我錯,大不了少咗享受,但係到最後,我都會有個Pleasant Surprise。

 

李兆富

Facebook Comments

Leave a comment