信報 (經管智慧 B17, 2012.10.17)

 

10 月1 日南丫島海難中被撞沉沒的南丫四號於本星期初進行打撈，船隻被吊離水面時巨大裂痕清晰可見，當時恐怖可想而知；在此謹願死難者主懷安息。

上星期與一位學會暑期實習生A 相聚，言談間A說起大學學生會因為「盈餘」過多，開會後提議動用餘下學校撥款，資助購買酒精飲品，好讓大家於派對中盡興，於是設立了一個網上問卷，要知道同學們意見如何。

 

辯論問題不着邊際

大學生中不少人好酒，亦有人對酒精厭惡。網上問卷調查片刻之間就變成email 間的激辯。A一邊打開email，一邊講述同學間的正反論據。祝越山雖會間中飲兩杯，對杯中物卻談不上喜愛，學生會撥款亦不過OPM之財，少人關心；但看着email 中，同學們努力搬出數據論點，誓要說服對方，卻是有趣非常。

講論一番後，同學A 問祝越山意見如何。每個議題都有正反兩面，有人支持，有人反對；大家立場不同，很多事情根本難以取得共識。我反問A：「或者我們應該問問自己，資助買酒到底是否恰當？」A 才發現，原來辯論以來，他們一直都忽略了問題的最中心。

過去周日，城市論壇就特惠生果金進行辯論，話題主要環繞資產審查，其他卻少有提及。

獅子山學會一向反對全民派錢計劃；沒有資產審查的特惠生果金，其實不過是改名換姓的「全民退休保障」，張超雄、王國興議員大聲要求取消資產審查，難道事出無因？

老實說， 「全民退休保障」這六個字確實美妙動聽。作為打工仔一族，我們最大的願望就是「唔使do」！係咪？如果退休之後，唔使做，又可以每個月現兜兜收三千蚊，真係聽到都覺得開心。

問題是，香港早已發展成一個富裕的社會，而我們今時今日都仲未可以去到「唔使do」的地步，到底發生咗咩問題？是我們工作狂？定係政府搞鬼，逼我們繼續do？

香港人其實都曾經有一段時間幻想我們「唔使do」，嗰年叫97；只要個樓市繼續咁樣升多幾個月呢，咁到時我們就個個都「唔使do」啦。

到時全香港得董伯伯一個人do，公眾假期要嚟做咩？咁董伯伯都要放假架嘛。

當然，這個世界邊有咁理想，而「唔使do」這個夢想亦都隨金融風暴打到而愈來愈遠。直到03年，香港人先真正明白咩叫「唔使do」，你想做死一世？炒你魷魚。嗰一刻我們夢想成真——「唔使do」，但個種心情、感覺亦同個仔出世一樣，真係一世人都唔會忘記。

政黨支持全民派錢，更羅列數據指全民派錢是一個可持續計劃。祝越山雖讀精算出身，卻無未卜先知之能，連恒指聽日升定跌都未估到，叫我估幾十年，只會貽笑大方，還是等歷史去證明。

港英政府於80 年代估算香港人口於2010 年將達1000 萬，可惜到2010 年，香港人口都不過700 萬，個Model
根本錯到離晒譜；或者讀書愈多，我們才愈發現數據不可靠。

今日唔知聽日事，有好多事情，好似世界末日咁樣，真係未到發生嗰刻都唔知。報載環保團體表示因為人類過度捕魚，2048
年我們可能會無魚食；你可以用一堆數據去證明你的論據，但2048 年有無魚食，或者真係要2048年先知喎。

 

全民派錢父債子償

雖然沒有人知道全民派錢計劃、特惠生果金到最後會否令香港破產；但前人經驗多少可以指點迷津。全民派錢派到最後，都總有一個人要埋單，遠唔使講，望一望歐洲，埋單的痛楚清楚可見。

討論全民派錢計劃到底係利多於弊，還是弊多於利，對祝越山而言就等於問到底郭靖好打，還是喬峰勁？討論多100
年都唔會有結果。但我知道，如果今日香港全民派錢，最後埋單嗰個，極有可能係我個仔。

雖然，豬國或者如李卓人所講，破產都爽了幾十年嘛。但開心完，都一樣要埋單架。食完飯唔使俾錢？邊有咁着數呀！

祝越山凡人一名，父母從小教導腳踏實地；發達由天，努力工作，有能力供養父母、有個美滿家庭則已然心足。祝越山不介意一生兒女債，但絕對介意將來兒子出世之時，已經注定一世為我還債；避免將債務禍延小朋友，我相信是對小孩子最好的禮物，亦是作為一個（未來）父親最負責任的做法。

做人要負責任，傳統智慧總有它的存在價值。

 

獅子山學會政策研究員

祝越山

info@lionrockinstitute.org