金手指:重申一注買珠管

蘋果日報 (財經要聞B07, 2013.03.19)

 

上個禮拜風平浪靜,轉到今周天下大亂。今日入題前,想先賣個小廣告。下個禮拜三晚,孫柏文會繼上個月李兆富咁,幫獅子山學會做個seminar,名額30,收費50。會講點喺泡沫上、落車,由97紅籌到07直通車。Google個題「坐上神話的順風車」同我個名就搵到。相信冇乜50蚊嘅活動,可令大家唔覺得自己嘥咗兩個鐘頭嘅生命。

入題。上個禮拜二,應承大家講珠江鋼管(1938)。舊年3月6日,珠管賣3.18元,我第一次叫大家一注獨贏買珠江鋼管。噚日收3.37元,升少少。當然,作為明燈,隻嘢要舊年先落1.73元後再上。

我曾話過買珠管係因為佢係頁岩氣概念股中,最唔會被國家發改委影響,因為佢會因全球頁岩氣革命受惠。咁舊年,佢哋幾年前上市集資話要增加產量嘅計劃,卒之投產,上半年收入升26%,毛利不但冇因生產量上升而下跌,仲要升。冇計,天然氣沸點喺零下百幾度,氣體運輸最有冇成本效益,所以管道需求先咁勁。

佢今個禮拜五公佈業績,屆時我睇佢營業額同利潤最少升兩成五,仲要打後都會咁。現時市場唔信,所以先得9倍市盈率。情況似舊年中期前,股價俾人質,之後一出業績就升到飛街。如果業績符合我嘅預期,應該喺短期內升到5元。雖然舊年唔到,不過我亦重申12個月目標價7元,升幅一倍。

 

歐美會有托市措施

最後講塞浦路斯。佢哋方案未落實,已經轉軚,話由兩層掠水方案,變三層。所以最終仲大把變化空間,可能最終話當冇發生過。用通脹偷存戶購買力都未夠快,惟有直接搶。美帝同歐帝官員已知方案同其可能有嘅後果,所以一定有托市措施。

唔同意可以喺下個禮拜三晚來面對面鬧我。

 

孫柏文

獨立股評人

http://facebook.com/shuen

Facebook Comments

Leave a comment