利字當頭:炒家

利世民, 蘋果日報 ( 財經要聞, B15  05.06.2010)

「大陸人炒到香港啲樓貴晒,政府要認真考慮,終止咗個投資移民計劃。」表姐Amy是中環上班族,也是業主,她擔心的不是上車問題,「有朝一日,佢哋一齊將手上嘅貨放售,香港仲唔畀佢哋玩殘?」

投資移民資金3成買樓

「冇幾耐前,政府公佈,由03年到家陣,投資移民吸引到470億,當中得三成,即係141億左右係樓,好難炒得起個市。」世民有數字在手,才有點把握,畢竟中環OL是智商最高的一群。
「咁仲死,即係話入嚟炒樓嘅資金,連綁死七年嘅限制都冇,隨時走得人。」說到底,原來Amy是擔心自己的身家。「咁投資嘅嘢,向來都係自由買賣,想幾時走就幾時走。有買,自然有賣,咁個交易先至可以完成。有邊個講得實,自己次次撈底摸頂?唔係過得一年半載,都唔知自己係早咗走,定係搵人接火棒。」世民多年投資經驗,市場沒有長勝將軍,買賣,大家都是估估吓。

「我最擔心係,好似我細佬、你表弟,佢日日鬼殺咁嘈,話如果再上唔到車,佢以後都買唔到。世民,你有炒股票,你都知,個市就快要見頂,就有一班盲頭烏蠅……」「哦,原來你驚個市爆。如果有朝一日,連班盲頭烏蠅都可以不勞而獲,你就真係要驚。」

怕炒家撤走班錢返內地

「講開又講,大陸打擊炒樓會唔會累到香港。」Amy問。「有一個講法,就係話上面如果真係出現骨牌效應,可能有炒家要班錢上去救。不過又有人話,上面越打壓得厲害,就越多錢倒落嚟。」「你即係乜都冇講過!」中環OL的耐性非常有限,「一句到尾,樓市係唔係仲有得升?」

「我用著名球評家嘅方法答你:個樓市唔升,跌嘅可能性就會增加;唔跌,升嘅可能性就會增加。仲有,根據監管當局指引,我要提醒你,槓桿投資前,請先了解產品結構,並衡量個人可承受風險,投資產品價格可跌可升,投資者可失去全部投資金額。」

利世民

 

Facebook Comments

Leave a comment