Wikileaks中的香港

孫柏文- am730 (大明燈, M28, 01/12/2010)

呢幾日, 相信大家都好似孫柏文咁, 有留意國際級爆料網站Wikileaks(維基解密)(我譯做《維基金手指》)單挑美帝呢單嘢。呢個連一支槍桿子都冇嘅網站,搞咩咁犀利?就係將花旗國外交部,與各地啲美國大使館來往嘅電報,話會陸陸續續爆出來,最後公開25萬份之多。

 

咁依家,直至筆者落筆呢刻,網站就只係爆咗200幾份,冰山一角上嘅一粒塵咁大把。不過就算係咁少,各地傳媒已爭相報道。咩蝙蝠俠同羅賓、冇著衫嘅國王、專搞靚女護士嘅非洲獨裁者等。不過,對於我呢個井底之蛙嘅特區香港人來講,呢啲嘢who cares?根本係眾所周知嘅事實,不過駐外嘅美帝外交官文筆好,咁寫睇落過癮啲。

其實我想知道嘅係,究竟美帝點睇我哋呢個亞洲國際城市先?如果普京同梅德韋傑夫係蝙蝠俠同羅賓,我哋曾特首最起碼都係《足球小將》嘅良仔啦!作為負責任嘅傳媒工作者,咁我就即刻叫咗我嘅助手搵Google,幫我摷摷。

點知喺281份電報中,居然冇一份交代喺美帝眼中,北京眼中嘅「小曾」究竟係咩卡通人物!我好唔高興囉。有「Hong Kong」兩字嘅報告,都係得3份。第一份係喺09年中講啲美外交官聽到啲北京官員點睇北韓,完全唔關特區事,只不過有份打報告嘅人係駐港美領事,所以Hong Kong先出現。

第二次就喺09年6月4日報告,係一名美外交官同新加坡國父李光耀嘅私下傾談記錄。

由北韓到伊朗都有傾過,不過主要都係講番李國父點睇我國走勢同兩岸關係。講到香港嗰幾段,就係話中央喺嗰刻一定要全力谷經濟,令09年初因港商執笠而引發嘅華南暴亂唔可以再發生。

咁被問關於台灣時,李光耀就話,胡主席冇江主席嗰種自我迫切性去完成兩岸統一。胡主席對台有彈性,能屈能伸。話喺嗰刻,中央雖已表態放水南下明益港人,不過冇向台灣表態過。李光耀亦有話,胡主席其實真係想李克强接棒,不過見習近平被其他領導人接受,所以都冇所謂,搵習近平接棒。

不過睇咗兩份,除咗李光耀又再凸顯我哋向北揸乞兒兜嘅形象外,好似冇啲真係反映我哋香港地位嘅嘢。正當我想低頭哭泣之際,就睇到最後一份文件。呢份電報,就係喺今年2月1日打嘅,裡面就係講話有間位於福田嘅公司,叫做「香港四星電子」。佢哋好似將俄羅斯高科技公司製嘅飛彈導航器材,賣俾伊朗嘅光學科技公司。有咩咁特別?咪就係不論嗰間公司係咪港人話事都好,要做貿易轉口生意,公司名最好都係有個「香港」喺裡面會多啲人信。由俄羅斯到伊朗,要做sourcing,唔搵我哋港人點得㗎?由開埠時班compradore(買辦),到今日嘅利豐(494),Wikileaks今次真係省靚我哋個金漆招牌囉!

(作者為前石油業證券分析員,視股市為終身學習場所,不斷交學費。)

 

Facebook Comments

Leave a comment