am730 (大明燈 M33, 2011.4.6)

放假，被奧斯卡最佳紀錄片「呃錢帝國」的Trailer吸引住，套戲大致上搵美國華爾街金融業猛人，披露大鱷點樣亂使錢，學界教授點樣頂唔住金錢利誘，幫冰島寫「鱔稿」等的驚人真相。當時，我除想睇呢套戲之外，仲諗，原來香港金融中心地位已經好鞏固，唔使驚上海有咩挑戰，因為我們學華爾街，學到十足十，連官商勾結、罔顧公眾利益一瓣都似埋，我佩服！

高盛「烏輪」事件，發生近一個星期，高盛封咀，港交所(388)又唔開聲，行家們鬧、鬧、鬧都係得個桔，因為港交所同高盛只係閉門傾掂數，唔理外界聲音。大家試諗下，港交所行政總裁李小加咪就係投資銀行出身囉，投行同投行對咀，最唔著數咪就係「扑中」日經輪班投資者。
 
睇番報道，有輪場人士話，預單會石沉大海，因為兩個單位都「龜縮」，高盛後台仲要好勁，作為美資大行，搵律師團隊深入研究之後，發現原來可以甩身，因為出事的上市文件，一早寫容許更正錯誤的條文，咁即係話，高盛一定可以輕易過關，唔怪得之呢幾日，高盛冇出來調停，一味實施拖之訣，認為唔使賠錢了事。
 
最慘其實係港交所，批咁既上市文件出街，仲要對投資者毫無保障，「你話改條款？好啦，我俾。你話改符號？冇問題。」原來港交所咁大間機構，係同「順嫂」同出一轍。香港仲掛住係法治之區？死晒啦，不如，隻10073個名可以叫日經輪，行使價都係11,000點，不過唔係日經225指數，係標普500指數阿笨？咩都可以亂來。
 
香港辛辛苦苦建立了有序兼且受國際投資者認同的投資市場，一就被打殘。搵返套經典電視劇集「大時代」的股票必勝法，葉天臨終前，傳授俾方展博，開頭係咁講，「股市原意，乃讓集資投資有其地，社會向榮，人皆有賺」，喂，電視劇都有教，股市係集資投資有其地，有透明度，可以唔使同人合併，係我優勢。而家咁樣搞法，根本就將股市原意大扭曲，大行玩晒，騎劫香港交易所。而家，生在香港，市民會驚食物有輻射被污染，活在金融界，我係驚，金融市場就此留下永不磨滅的烙印。

傳聞坐正港交所老總的小加，有強勁後台，來到港交所一定要做到豐功偉績，因為點都要追返前任總裁周文耀的功績，結果就搵著業界搞，一人獨大，個個聽命。
 
不過你後台幾勁，人人都有執位時間表。明年，當國家、香港重要人物都要大執位時，後台幾硬幾龐大都要退位讓賢。到出年，孫柏文仲會度，李總，你呢？