Justin Bieber的迷思

am730 (大明燈 M32, 2011.5.23)

上周寫卡恩都算係n e w s , J u s t i n Bieber關咩事呢?話說10日前,我去睇佢演唱會,係呀,係孫柏文呀,30幾歲人去睇個「靚仔」concert!在場中我坐980蚊飛,同Justin幾近,但全場我唔enjoy,一來病,二來真係鬥唔過班「靚妹」。你叫我跳舞,我ok,叫我尖叫,不停講I LoveYou,我真係頂唔順。我們一行六人,最enjoy係我個女同事,芳齡27,即大Justin十年,初頭佢都被現場的女fans嚇窒(細到7歲都有,未開場已搖身搖勢),望到佢一身西裝褸OL打扮,我諗佢一陣唔會太瘋狂,可惜最尾估錯。呢位同事比十幾歲女仔更癲!

J u s t i n唔係最叻歌唱家,亦唔係跳舞家,而係最佳entertainer。佢有能力「立」晒7至27歲少女的心,你都咪話唔勁。你諗,佢17歲,即係細佢10歲或大佢10歲都為之傾倒,呢唔易。記得佢問台下;「I just came to HK yesterday, andI found many pretty girls here, anyone can tell me who is single girl?」講完呢句,在場萬幾二萬人一齊舉手,猛叫「Iam single, I am single.」直情想飛撲上台咁,連我個女同事都係咁。

Justin刻不但似皇帝揀妃嬪,手中支貌似咪物體根本就係隻玻璃鞋,個個女觀眾就對號入座咁仲估自己係灰姑娘,遲早搖身一變成公主。真係一個好厲害市場定位!唔怪得佢歌同演唱會飛咁好賣!我知Justin真係得,有排紅,到佢簽名真係好似80年代買到手豐控股(005)一樣,必勁升、要長!

作為男人,睇到呢個場面,點會唔羨慕,我心諗;「我成日出席一些財經論壇,如果我拎咪問現場有冇單身女仔,我深信冇人會舉手!」哈哈!或咁講,下次我講白銀目標價或講股票號碼,我打算只係話俾單身女仔知,等我都吸納女性fans!唔好齋講女fans,Justin的包裝技巧都好高。張飛寫明8點開show,到8點半,有對女子組合出來show off搞下氣氛,但都冇咩用,現場反應唔大。個女子組得最大聲支持,都係因為問:「呢度邊個鍾意Justin Bieber?」我話我唔enjoy,唔係掛住妒忌Justin,而係我張成千蚊的飛仲要冒生命危險!點解有生命危險?你有冇試過成千上萬「靚妹」好似西班牙Pamplona奔牛節咁你身邊跑過?

我坐正一班外籍少女前,佢十幾歲,把聲分貝一定過150,Justin未出場已叫到拆天,成場仲要荷爾蒙上腦,唱唱下歌冇人出聲,仲不停同Justin講「I LoveYou」,好明顯呢係妄想症,以為呢個世界得番佢同Justin兩個人,其他人唔存在。個種magic暫時我只係諗到Justin做到,搞到女仔瘋狂成咁!一個「服」字,唔可以唔寫,我睇好佢可以好似JustinTimberlake或張國榮咁,紅足咁耐。

好彩前晚睇Maroon 5,我搵番自己與 同齡人士一齊跳同叫,咁先冇咁灰……… 你或會問呢期到底睇幾多演唱會?我一個月去3次機場博覽館,大開眼界。

 

Facebook Comments

Leave a comment